శ్రీ మృత్యుంజయ మానసిక పూజా స్తోత్రం
కైలాసే కమనీయరత్నఖచితే కల్పద్రుమూలే స్థితం
కర్పూరస్ఫటికేందుసుందరతనుం కాత్యాయనీసేవితమ్ |
గంగాతుంగతరంగరంజితజటాభారం కృపాసాగరం
కంఠాలంకృతశేషభూషణమముం మృత్యుంజయం భావయే || ౧ ||
ఆగత్య మృత్యుంజయ చంద్రమౌళే
వ్యాఘ్రాజినాలంకృత శూలపాణే |
స్వభక్తసంరక్షణకామధేనో
ప్రసీద విశ్వేశ్వర పార్వతీశ || ౨ ||
భాస్వన్మౌక్తికతోరణే మరకతస్తంభాయుతాలంకృతే
సౌధే ధూపసువాసితే మణిమయే మాణిక్యదీపాంచితే |
బ్రహ్మేంద్రామరయోగిపుంగవగణైర్యుక్తే చ కల్పద్రుమైః
శ్రీమృత్యుంజయ సుస్థిరో భవ విభో మాణిక్యసింహాసనే || ౩ ||
మందారమల్లీకరవీరమాధవీ- -పున్నాగనీలోత్పలచంపకాన్వితైః |
కర్పూరపాటీరసువాసితైర్జలై- -రాధత్స్వ మృత్యుంజయ పాద్యముత్తమమ్ || ౪ ||
సుగంధపుష్పప్రకరైః సువాసితై- -ర్వియన్నదీశీతలవారిభిః శుభైః |
త్రిలోకనాథార్తిహరార్ఘ్యమాదరా- -ద్గృహాణ మృత్యుంజయ సర్వవందిత || ౫ ||
హిమాంబువాసితైస్తోయైః శీతలైరతిపావనైః |
మృత్యుంజయ మహాదేవ శుద్ధాచమనమాచర || ౬ ||
గుడదధిసహితం మధుప్రకీర్ణం సుఘృతసమన్వితధేనుదుగ్ధయుక్తమ్ |
శుభకర మధుపర్కమాహర త్వం త్రినయన మృత్యుహర త్రిలోకవంద్య || ౭ ||
పంచాస్త్ర శాంత పంచాస్య పంచపాతకసంహర |
పంచామృతస్నానమిదం కురు మృత్యుంజయ ప్రభో || ౮ ||
జగత్త్రయీఖ్యాత సమస్తతీర్థ- -సమాహృతైః కల్మషహారిభిశ్చ |
స్నానం సుతోయైః సముదాచర త్వం మృత్యుంజయానంతగుణాభిరామ || ౯ ||
ఆనీతేనాతిశుభ్రేణ కౌశేయేనామరద్రుమాత్ |
మార్జయామి జటాభారం శివ మృత్యుంజయ ప్రభో || ౧౦ ||
నానాహేమవిచిత్రాణి చీరచీనాంబరాణి చ |
వివిధాని చ దివ్యాని మృత్యుంజయ సుధారయ || ౧౧ ||
విశుద్ధముక్తాఫలజాలరమ్యం మనోహరం కాంచనహేమసూత్రమ్ |
యజ్ఞోపవీతం పరమం పవిత్ర- -మాధత్స్వ మృత్యుంజయ భక్తిగమ్య || ౧౨ ||
శ్రీగంధం ఘనసారకుంకుమయుతం కస్తూరికాపూరితం
కాలేయేన హిమాంబునా విరచితం మందారసంవాసితమ్ |
దివ్యం దేవమనోహరం మణిమయే పాత్రే సమారోపితం
సర్వాంగేషు విలేపయామి సతతం మృత్యుంజయ శ్రీవిభో || ౧౩ ||
అక్షతైర్ధవలైర్దివ్యైః సమ్యక్తిలసమన్వితైః |
మృత్యుంజయ మహాదేవ పూజయామి వృషధ్వజ || ౧౪ ||
చంపకపంకజకురవకకుందైః కరవీరమల్లికాకుసుమైః |
విస్తారయ నిజమకుటం మృత్యుంజయ పుండరీకనయనాప్త || ౧౫ ||
మాణిక్యపాదుకాద్వంద్వే మౌనిహృత్పద్మమందిరే |
పాదౌ సత్పద్మసదృశౌ మృత్యుంజయ నివేశయ || ౧౬ ||
మాణిక్యకేయూరకిరీటహారైః కాంచీమణిస్థాపితకుండలైశ్చ |
మంజీరముఖ్యాభరణైర్మనోజ్ఞై- -రంగాని మృత్యుంజయ భూషయామి || ౧౭ ||
గజవదనస్కందధృతే- -నాతిస్వచ్ఛేన చామరయుగేన |
గలదలకాననపద్మం మృత్యుంజయ భావయామి హృత్పద్మే || ౧౮ ||
ముక్తాతపత్రం శశికోటిశుభ్రం శుభప్రదం కాంచనదండయుక్తమ్ |
మాణిక్యసంస్థాపితహేమకుంభం సురేశ మృత్యుంజయ తేఽర్పయామి || ౧౯ ||
మణిముకురే నిష్పటలే త్రిజగద్గాఢాంధకారసప్తాశ్వే |
కందర్పకోటిసదృశం మృత్యుంజయ పశ్య వదనమాత్మీయమ్ || ౨౦ ||
కర్పూరచూర్ణం కపిలాజ్యపూతం దాస్యామి కాలేయసమాన్వితైశ్చ |
సముద్భవం పావనగంధధూపితం మృత్యుంజయాంగం పరికల్పయామి || ౨౧ ||
వర్తిత్రయోపేతమఖండదీప్త్యా తమోహరం బాహ్యమథాంతరం చ |
సాజ్యం సమస్తామరవర్గహృద్యం సురేశ మృత్యుంజయ వంశదీపమ్ || ౨౨ ||
రాజాన్నం మధురాన్వితం చ మృదులం మాణిక్యపాత్రే స్థితం
హింగూజీరకసన్మరీచిమిలితైః శాకైరనేకైః శుభైః |
శాకం సమ్యగపూపసూపసహితం సద్యోఘృతేనాప్లుతం
శ్రీమృత్యుంజయ పార్వతీప్రియ విభో సాపోశనం భుజ్యతామ్ || ౨౩ ||
కూశ్మాండవార్తాకపటోలికానాం ఫలాని రమ్యాణి చ కారవల్ల్యా |
సుపాకయుక్తాని ససౌరభాణి శ్రీకంఠ మృత్యుంజయ భక్షయేశ || ౨౪ ||
శీతలం మధురం స్వచ్ఛం పావనం వాసితం లఘు |
మధ్యే స్వీకురు పానీయం శివ మృత్యుంజయ ప్రభో || ౨౫ ||
శర్కరామిలితం స్నిగ్ధం దుగ్ధాన్నం గోఘృతాన్వితమ్ |
కదలీఫలసంమిశ్రం భుజ్యతాం మృత్యుసంహర || ౨౬ ||
కేవలమతిమాధుర్యం దుగ్ధైః స్నిగ్ధైశ్చ శర్కరామిలితైః |
ఏలామరీచమిలితం మృత్యుంజయ దేవ భుంక్ష్వ పరమాన్నమ్ || ౨౭ ||
రంభాచూతకపిత్థకంఠకఫలైర్ద్రాక్షారసస్వాదుమ-
-త్ఖర్జూరైర్మధురేక్షుఖండశకలైః సన్నారికేలాంబుభిః |
కర్పూరేణ సువాసితైర్గుడజలైర్మాధుర్యయుక్తైర్విభో
శ్రీమృత్యుంజయ పూరయ త్రిభువనాధారం విశాలోదరమ్ || ౨౮ ||
మనోజ్ఞరంభావనఖండఖండితా- -న్రుచిప్రదాన్సర్షపజీరకాంశ్చ |
ససౌరభాన్సైంధవసేవితాంశ్చ గృహాణ మృత్యుంజయ లోకవంద్య || ౨౯ ||
హింగూజీరకసహితం వమలామలకం కపిత్థమతిమధురమ్ |
బిసఖండాఁల్లవణయుతా- -న్మృత్యుంజయ తేఽర్పయామి జగదీశ || ౩౦ ||
ఏలాశుంఠీసహీతం దధ్యన్నం చారుహేమపాత్రస్థమ్ |
అమృతప్రతినిధిమాఢ్యం మృత్యుంజయ భుజ్యతాం త్రిలోకేశ || ౩౧ ||
జంబీరనీరాంచితశృంగబేరం మనోహరానమ్లశలాటుఖండాన్ |
మృదూపదంశాన్సహసోపభుంక్ష్వ మృత్యుంజయ శ్రీకరుణాసముద్ర || ౩౨ ||
నాగరరామఠయుక్తం సులలితజంబీరనీరసంపూర్ణమ్ |
మథితం సైంధవసహితం పిబ హర మృత్యుంజయ క్రతుధ్వంసిన్ || ౩౩ ||
మందారహేమాంబుజగంధయుక్తై- -ర్మందాకినీనిర్మలపుణ్యతోయైః |
గృహాణ మృత్యుంజయ పూర్ణకామ శ్రీమత్పరాపోశనమభ్రకేశ || ౩౪ ||
గగనధునీవిమలజలై- -ర్మృత్యుంజయ పద్మరాగపాత్రగతైః |
మృగమదచందనపూర్ణం ప్రక్షాలయ చారు హస్తపదయుగ్మమ్ || ౩౫ ||
పుంనాగమల్లికాకుందవాసితైర్జాహ్నవీజలైః |
మృత్యుంజయ మహాదేవ పునరాచమనం కురు || ౩౬ ||
మౌక్తికచూర్ణసమేతై- -ర్మృగమదఘనసారవాసితైః పూగైః |
పర్ణైః స్వర్ణసమానై- -ర్మృత్యుంజయ తేఽర్పయామి తాంబూలమ్ || ౩౭ ||
నీరాజనం నిర్మలదీప్తిమద్భి- -ర్దీపాంకురైరుజ్జ్వలముచ్ఛ్రితైశ్చ |
ఘంటానినాదేన సమర్పయామి మృత్యుంజయాయ త్రిపురాంతకాయ || ౩౮ ||
విరించిముఖ్యామరబృందవందితే సరోజమత్స్యాంకితచక్రచిహ్నితే |
దదామి మృత్యుంజయ పాదపంకజే ఫణీంద్రభూషే పునరర్ఘ్యమీశ్వర || ౩౯ ||
పుంనాగనీలోత్పలకుందజాజీ- -మందారమల్లీకరవీరపంకజైః |
పుష్పాంజలిం బిల్వదలైస్తులస్యా మృత్యుంజయాంఘ్రౌ వినివేశయామి || ౪౦ ||
పదే పదే సర్వతమోనికృంతనం పదే పదే సర్వశుభప్రదాయకమ్ |
ప్రదక్షిణం భక్తియుతేన చేతసా కరోమి మృత్యుంజయ రక్ష రక్ష మామ్ || ౪౧ ||
నమో గౌరీశాయ స్ఫటికధవళాంగాయ చ నమో
నమో లోకేశాయ స్తుతవిబుధలోకాయ చ నమః |
నమః శ్రీకంఠాయ క్షపితపురదైత్యాయ చ నమో
నమః ఫాలాక్షాయ స్మరమదవినాశాయ చ నమః || ౪౨ ||
సంసారే జనితాపరోగసహితే తాపత్రయాక్రందితే
నిత్యం పుత్రకలత్రవిత్తవిలసత్పాశైర్నిబద్ధం దృఢమ్ |
గర్వాంధం బహుపాపవర్గసహితం కారుణ్యదృష్ట్యా విభో
శ్రీమృత్యుంజయ పార్వతీప్రియ సదా మాం పాహి సర్వేశ్వర || ౪౩ ||
సౌధే రత్నమయే నవోత్పలదలాకీర్ణే చ తల్పాంతరే
కౌశేయేన మనోహరేణ ధవలేనాచ్ఛాదితే సర్వశః |
కర్పూరాంచితదీపదీప్తిమిలితే రమ్యోపధానద్వయే
పార్వత్యాః కరపద్మలాలితపదం మృత్యుంజయం భావయే || ౪౪ ||
చతుశ్చత్వారింశద్విలసదుపచారైరభిమతై- -ర్మనః పద్మే భక్త్యా బహిరపి చ పూజాం శుభకరీమ్ |
కరోతి ప్రత్యూషే నిశి దివసమధ్యేఽపి చ పుమా- -న్ప్రయాతి శ్రీమృత్యుంజయపదమనేకాద్భుతపదమ్ || ౪౫ ||
ప్రాతర్లింగముమాపతేరహరహః సందర్శనాత్స్వర్గదం
మధ్యాహ్నే హయమేధతుల్యఫలదం సాయంతనే మోక్షదమ్ |
భానోరస్తమయే ప్రదోషసమయే పంచాక్షరారాధనం
తత్కాలత్రయతుల్యమిష్టఫలదం సద్యోఽనవద్యం దృఢమ్ || ౪౬ ||
ఇతి శ్రీమచ్ఛంకరభగవతః కృతౌ శ్రీ మృత్యుంజయ మానసిక పూజా స్తోత్రం సంపూర్ణమ్ ||
Shri Mrityunjaya Manasika Puja Stotram
kailāsē kamanīyaratnakhacitē kalpadrumūlē sthitaṃ
karpūrasphaṭikēndusundaratanuṃ kātyāyanīsēvitam |
gaṅgātuṅgataraṅgarañjitajaṭābhāraṃ kṛpāsāgaraṃ
kaṇṭhālaṅkṛtaśēṣabhūṣaṇamamuṃ mṛtyuñjayaṃ bhāvayē || 1 ||
āgatya mṛtyuñjaya candramaulē
vyāghrājinālaṅkṛta śūlapāṇē |
svabhaktasaṃrakṣaṇakāmadhēnō
prasīda viśvēśvara pārvatīśa || 2 ||
bhāsvanmauktikatōraṇē marakatastambhāyutālaṅkṛtē
saudhē dhūpasuvāsitē maṇimayē māṇikyadīpāñcitē |
brahmēndrāmarayōgipuṅgavagaṇairyuktē ca kalpadrumaiḥ
śrīmṛtyuñjaya susthirō bhava vibhō māṇikyasiṃhāsanē || 3 ||
mandāramallīkaravīramādhavī- -punnāganīlōtpalacampakānvitaiḥ |
karpūrapāṭīrasuvāsitairjalai- -rādhatsva mṛtyuñjaya pādyamuttamam || 4 ||
sugandhapuṣpaprakaraiḥ suvāsitai- -rviyannadīśītalavāribhiḥ śubhaiḥ |
trilōkanāthārtiharārghyamādarā- -dgṛhāṇa mṛtyuñjaya sarvavandita || 5 ||
himāmbuvāsitaistōyaiḥ śītalairatipāvanaiḥ |
mṛtyuñjaya mahādēva śuddhācamanamācara || 6 ||
guḍadadhisahitaṃ madhuprakīrṇaṃ sughṛtasamanvitadhēnudugdhayuktam |
śubhakara madhuparkamāhara tvaṃ trinayana mṛtyuhara trilōkavandya || 7 ||
pañcāstra śānta pañcāsya pañcapātakasaṃhara |
pañcāmṛtasnānamidaṃ kuru mṛtyuñjaya prabhō || 8 ||
jagattrayīkhyāta samastatīrtha- -samāhṛtaiḥ kalmaṣahāribhiśca |
snānaṃ sutōyaiḥ samudācara tvaṃ mṛtyuñjayānantaguṇābhirāma || 9 ||
ānītēnātiśubhrēṇa kauśēyēnāmaradrumāt |
mārjayāmi jaṭābhāraṃ śiva mṛtyuñjaya prabhō || 10 ||
nānāhēmavicitrāṇi cīracīnāmbarāṇi ca |
vividhāni ca divyāni mṛtyuñjaya sudhāraya || 11 ||
viśuddhamuktāphalajālaramyaṃ manōharaṃ kāñcanahēmasūtram |
yajñōpavītaṃ paramaṃ pavitra- -mādhatsva mṛtyuñjaya bhaktigamya || 12 ||
śrīgandhaṃ ghanasārakuṅkumayutaṃ kastūrikāpūritaṃ
kālēyēna himāmbunā viracitaṃ mandārasaṃvāsitam |
divyaṃ dēvamanōharaṃ maṇimayē pātrē samārōpitaṃ
sarvāṅgēṣu vilēpayāmi satataṃ mṛtyuñjaya śrīvibhō || 13 ||
akṣatairdhavalairdivyaiḥ samyaktilasamanvitaiḥ |
mṛtyuñjaya mahādēva pūjayāmi vṛṣadhvaja || 14 ||
campakapaṅkajakuravakakundaiḥ karavīramallikākusumaiḥ |
vistāraya nijamakuṭaṃ mṛtyuñjaya puṇḍarīkanayanāpta || 15 ||
māṇikyapādukādvandvē maunihṛtpadmamandirē |
pādau satpadmasadṛśau mṛtyuñjaya nivēśaya || 16 ||
māṇikyakeyūrakirīṭahāraiḥ kāñcīmaṇisthāpitakuṇḍalaiśca |
mañjīramukhyābharaṇairmanōjñai- -raṅgāni mṛtyuñjaya bhūṣayāmi || 17 ||
gajavadana skandadhṛtē- -nāti svacchēna cāmarayugēna |
galadalakānanapadmaṃ mṛtyuñjaya bhāvayē hṛtpadmē || 18 ||
muktātapatraṃ śaśikōṭiśubhraṃ śubhapradaṃ kāñcanadaṇḍayuktam |
māṇikyasaṃsthāpitahēmakumbhaṃ surēśa mṛtyuñjaya tē’rpayāmi || 19 ||
maṇimukurē niṣpaṭalē trijagadgāḍhāndhakārasaptāśvē |
kandarpakōṭisadṛśaṃ mṛtyuñjaya paśya vadanamātmīyam || 20 ||
karpūracūrṇaṃ kapilājyapūtaṃ dāsyāmi kālēyasamanvitaiśca |
samudbhavaṃ pāvanagandhadhūpitaṃ mṛtyuñjayāṅgaṃ parikalpayāmi || 21 ||
vertitrayōpētamakhaṇḍadīptyā tamōharaṃ bāhyamathāntaraṃ ca |
sājyaṃ samastāmaravargahṛdyaṃ surēśa mṛtyuñjaya vaṃśadīpam || 22 ||
rājānnaṃ madhurānvitaṃ ca mṛdulaṃ māṇikyapātrē sthitaṃ
hiṅgūjīrakasanmarīcimilitaiḥ śākairanēkaiḥ śubhaiḥ |
śākaṃ samyagapūpasūpasahitaṃ sadyōghṛtēnāplutaṃ
śrīmṛtyuñjaya pārvatīpriya vibhō sāpōśanaṃ bhujyatām || 23 ||
kūśmāṇḍavārtākapāṭōlikānāṃ phalāni ramyāṇi ca kāravallyā |
supākayuktāni sasaurabhāṇi śrīkaṇṭha mṛtyuñjaya bhakṣayēśa || 24 ||
śītalaṃ madhuraṃ svacchaṃ pāvanaṃ vāsitaṃ laghu |
madhyē svīkuru pānīyaṃ śiva mṛtyuñjaya prabhō || 25 ||
śarkarāmilitaṃ snigdhaṃ dugdhānnaṃ gōghṛtānvitam |
kadalīphalasaṃmiśraṃ bhujyatāṃ mṛtyusaṃhara || 26 ||
kēvalamatimādhuryaṃ dugdhaiḥ snigdhaiśca śarkarāmilitaiḥ |
ēlāmarīcamilitaṃ mṛtyuñjaya dēva bhuṅkṣva paramānnam || 27 ||
rambhācūtakapitthakaṇṭhakaphalairdrākṣārasasvāduma-
-tkhārzūrai rmadhurēkṣukhaṇḍaśakalaiḥ sannārikēlāmbubhiḥ |
karpūrēṇa suvāsitairguḍajalairmādhuryayuktairvibhō
śrīmṛtyuñjaya pūraya tribhuvanādhāraṃ viśālōdaram || 28 ||
manōjñarambhāvanakhaṇḍakhaṇḍitā- -nrucipradānsarṣapajīrakāṃśca |
sasaurabhānsaindhavasēvitāṃśca gṛhāṇa mṛtyuñjaya lōkavandya || 29 ||
hiṅgūjīrakasahitaṃ vimalāmalakaṃ kapitthamatimadhuram |
bisakhaṇḍām̐llavaṇayutā- -nmṛtyuñjaya tē’rpayāmi jagadīśa || 30 ||
ēlāśuṇṭhīsahītaṃ dadhyānnaṃ cāruhēmapātrastham |
amṛtapratinidhimāḍhyaṃ mṛtyuñjaya bhujyatāṃ trilōkēśa || 31 ||
jambīranīrāñcitaśṛṅgabēraṃ manōharānamlaśalāṭukhaṇḍān |
mṛdūpadaṃśānsahasōpabhuṅkṣva mṛtyuñjaya śrīkaruṇāsamudra || 32 ||
nāgararāmaṭhayuktaṃ sulalitajambīranīrasaṃpūrṇam |
mathitaṃ saindhavasahitaṃ piba hara mṛtyuñjaya kratudhvaṃsin || 33 ||
mandārahēmāmbuja-gandhayuktai- -rmandākinīnirmalapuṇyatōyaiḥ |
gṛhāṇa mṛtyuñjaya pūrṇakāma śrīmatparāpōśanamabhrakēśa || 34 ||
gaganadhunīvimalajalai- -rmṛtyuñjaya padmarāgapātragataiḥ |
mṛgamadacandana pūrṇaṃ prakṣālaya cāru hastapadayugmam || 35 ||
puṃnāgamallikākundavāsitairjāhnavījalaiḥ |
mṛtyuñjaya mahādēva punarācamanaṃ kuru || 36 ||
mauktikacūrṇasamētai- -rmṛgamadaghanasāravāsitaiḥ pūgaiḥ |
parṇaiḥ svarṇasamānai- -rmṛtyuñjaya tē’rpayāmi tāmbūlam || 37 ||
nīrājanaṃ nirmaladīptimadbhi- -rdīpāṅkurairujjvalamucchritaiśca |
ghaṇṭāninādēna samarpayāmi mṛtyuñjayāya tripurāntakāya || 38 ||
viriñcimukhyāmarabṛndavanditē sarōjāmatsyāṅkitacakracihnaitē |
dadāమి mṛtyuñjaya pādapaṅkajē phaṇīndrabhūṣē punararghyamīśvara || 39 ||
puṃnāganīlōtpalakundajāji- -mandāramallīkaravīrapaṅkajaiḥ |
puṣpāñjaliṃ bilvadalaistulasyā mṛtyuñjayāṅghrau vinivēśayāmi || 40 ||
padē padē sarvatamōనికṛntanaṃ padē padē sarvaśubhaprādayakam |
pradakṣiṇaṃ bhaktiyutēna cētasā karōmi mṛtyuñjaya rakṣa rakṣa mām || 41 ||
namō gaurīśāya sphaṭikadhavalāṅgāya ca namō
namō lōkēśāya stutavibudhalōkāya ca namaḥ |
namaḥ śrīkaṇṭhāya kṣapitapuradaityāya ca namō
namaḥ phālākṣāya smaramadavināśāya ca namaḥ || 42 ||
saṃsārē janitāparōgasahitē tāpatrayākranditē
nityaṃ putrakalatravittavilasatpāśairnibaddhaṃ dṛḍham |
garvāndhaṃ bahupāpavargasahitaṃ kāరుṇyadṛṣṭyā vibhō
śrīmṛtyuñjaya pārvatīpriya sadā māṃ pāhi sarvēśvara || 43 ||
saudhē ratnamayē navōtpaladalākīrṇē ca talpāntarē
kauśēyēna manōharēṇa dhavalēnācchāditē sarvaśaḥ |
karpūrāñcitadīpadīptimilitē ramyōpadhānadvayē
pārvatyāḥ karapadmalālitapadaṃ mṛtyuñjayaṃ bhāvayē || 44 ||
catuścatvāriṃśadvilasadupacārairabhimatai-
rmanaḥ padmē bhaktyā bahirapi ca pūjāṃ śubhakarīm |
karōti pratyūṣē niśi divasamadhyē’pi ca pumā-
nprayāti śrīmṛtyuñjayapadamānēkādbhutapadam || 45 ||
prātarliṅgamumāpatēraharahaḥ sandarśanātsvargadaṃ
madhyāhnē hayamēdhatulyaphaladaṃ sāyantanē mōkṣadam |
bhānōrastamayē pradōṣasamayē pañcākṣarārādhanaṃ
tatkālatrayatulyamiṣṭaphaladaṃ sadyō’navadyaṃ dṛḍham || 46 ||
iti śrīmacchaṅkarabhagavataḥ kṛtau śrī mṛtyuñjaya mānasika pūjā stōtraṃ saṃpūrṇam ||