శ్రీ మంగళ చండికా స్తోత్రం
ధ్యానం
దేవీం షోడశవర్షీయాం రమ్యాం సుస్థిరయౌవనామ్ |
సర్వరూపగుణాఢ్యాం చ కోమలాంగీం మనోహరామ్ || ౧ ||
శ్వేతచంపకవర్ణాభాం చంద్రకోటిసమప్రభామ్ |
వహ్నిశుద్ధాంశుకాధానాం రత్నభూషణభూషితామ్ || ౨ ||
బిభ్రతీం కబరీభారం మల్లికామాల్యభూషితమ్ |
బింబోష్ఠీం సుదతీం శుద్ధాం శరత్పద్మనిభాననామ్ || ౩ ||
ఈషద్ధాస్యప్రసన్నాస్యాం సునీలోత్పలలోచనామ్ |
జగద్ధాత్రీం చ దాత్రీం చ సర్వేభ్యః సర్వసంపదామ్ || ౪ ||
సంసారసాగరే ఘోరే పీతరుపాం వరాం భజే || ౫ ||
దేవ్యాశ్చ ధ్యానమిత్యేవం స్తవనం శ్రూయతాం మునే |
ప్రయతః సంకటగ్రస్తో యేన తుష్టావ శంకరః || ౬ ||
స్తోత్రం
శంకర ఉవాచ |
రక్ష రక్ష జగన్మాతర్దేవి మంగళచండికే |
సంహర్త్రి విపదాం రాశేర్హర్షమంగళకారికే || ౭ ||
హర్షమంగళదక్షే చ హర్షమంగళచండికే |
శుభే మంగళదక్షే చ శుభమంగళచండికే || ౮ ||
మంగళే మంగళార్హే చ సర్వమంగళమంగళే |
సతాం మంగళదే దేవి సర్వేషాం మంగళాలయే || ౯ ||
పూజ్యా మంగళవారే చ మంగళాభీష్టదైవతే |
పూజ్యే మంగళభూపస్య మనువంశస్య సంతతమ్ || ౧౦ ||
మంగళాధిష్ఠాతృదేవి మంగళానాం చ మంగళే |
సంసారే మంగళాధారే మోక్షమంగళదాయిని || ౧౧ ||
సారే చ మంగళాధారే పారే త్వం సర్వకర్మణామ్ |
ప్రతిమంగళవారం చ పూజ్యే త్వం మంగళప్రదే || ౧౨ ||
స్తోత్రేణానేన శంభుశ్చ స్తుత్వా మంగళచండికామ్ |
ప్రతిమంగళవారే చ పూజాం కృత్వా గతః శివః || ౧౩ ||
దేవ్యాశ్చ మంగళస్తోత్రం యః శృణోతి సమాహితః |
తన్మంగళం భవేచ్ఛశ్వన్న భవేత్తదమంగళమ్ || ౧౪ ||
ప్రథమే పూజితా దేవీ శంభునా సర్వమంగళా |
ద్వితీయే పూజితా దేవీ మంగళేన గ్రహేణ చ || ౧౫ ||
తృతీయే పూజితా భద్రా మంగళేన నృపేణ చ |
చతుర్థే మంగళే వారే సుందరీభిశ్చ పూజితా |
పంచమే మంగళాకాంక్షైర్నరైర్మంగళచండికా || ౧౬ ||
పూజితా ప్రతివిశ్వేషు విశ్వేశైః పూజితా సదా |
తతః సర్వత్ర సంపూజ్య సా బభూవ సురేశ్వరీ || ౧౭ ||
దేవాదిభిశ్చ మునిభిర్మనుభిర్మానవైర్మునే |
దేవ్యాశ్చ మంగళస్తోత్రం యః శృణోతి సమాహితః || ౧౮ ||
తన్మంగళం భవేచ్ఛశ్వన్న భవేత్తదమంగళమ్ |
వర్ధంతే తత్పుత్రపౌత్రా మంగళం చ దినే దినే || ౧౯ ||
ఇతి శ్రీ మంగళ చండికా స్తోత్రం సంపూర్ణం ||
śrī maṅgaḷa caṇḍikā stōtram
Dhyānam
dēvīṃ ṣōḍaśavarṣīyāṃ ramyāṃ susthirayāuvanām |
sarvarūpaguṇāḍhyāṃ ca kōmalāṅgīṃ manōharām || 1 ||
śvētacampakavarṇābhāṃ candrakōṭisamaprabhām |
vahnisuddhāṃśukādhānāṃ ratnabhūṣaṇabhūṣitām || 2 ||
bibhratīṃ kabarībhāraṃ mallikāmālyabhūṣitam |
bimbōṣṭhīṃ sudatīṃ śuddhāṃ śaratpadmanibhānanām || 3 ||
īṣaddhāsyaprasannāsyāṃ sunīlōptalalōcanām |
jagaddhātrīṃ ca dātrīṃ ca sarvēbhyaḥ sarvasampadām || 4 ||
saṃsārasāgarē ghōrē pītarupāṃ varāṃ bhajē || 5 ||
dēvyāśca dhyānamityēvaṃ stavanaṃ śrūyatāṃ munē |
prayataḥ saṅkaṭagrastō yēna tuṣṭāva śaṅkaraḥ || 6 ||
Stōtram
śaṅkara uvāca |
rakṣa rakṣa jagannātardēvi maṅgaḷacaṇḍikē |
saṃhartri vipadāṃ rāśēriharṣamaṅgaḷakārikē || 7 ||
harṣamaṅgaḷadakṣē ca harṣamaṅgaḷacaṇḍikē |
śubhē maṅgaḷadakṣē ca śubhamaṅgaḷacaṇḍikē || 8 ||
maṅgaḷē maṅgaḷārhē ca sarvamaṅgaḷamaṅgaḷē |
satāṃ maṅgaḷadē dēvi sarvēṣāṃ maṅgaḷālayē || 9 ||
pūjyā maṅgaḷavārē ca maṅgaḷābhīṣṭadaivatē |
pūjyē maṅgaḷabhūpasya manuvaṃśasya santatam || 10 ||
maṅgaḷādhiṣṭhāt r̥dēvi maṅgaḷānāṃ ca maṅgaḷē |
saṃsārē maṅgaḷādhārē mōkṣamaṅgaḷadāyini || 11 ||
sārē ca maṅgaḷādhārē pārē tvaṃ sarvakarmaṇām |
pratimaṅgaḷavāraṃ ca pūjyē tvaṃ maṅgaḷapradē || 12 ||
stōtrēṇānēna śambhuśca stutvā maṅgaḷacaṇḍikām |
pratimaṅgaḷavārē ca pūjāṃ kr̥tvā gataḥ śivaḥ || 13 ||
dēvyāśca maṅgaḷastōtraṃ yaḥ ś r̥ṇōti samāhitaḥ |
tanmaṅgaḷaṃ bhavēcchaśvanna bhavēttadamaṅgaḷam || 14 ||
prathamē pūjitā dēvī śambhunā sarvamaṅgaḷā |
dvitīyē pūjitā dēvī maṅgaḷēna grahēṇa ca || 15 ||
tr̥tīyē pūjitā bhadrā maṅgaḷēna nr̥pēṇa ca |
caturthē maṅgaḷē vārē sundarībhiśca pūjitā |
pañcamē maṅgaḷākāṅkṣāir-narāirmaṅgaḷacaṇḍikā || 16 ||
pūjitā prativisvēṣu viśvēśāiḥ pūjitā sadā |
tataḥ sarvatra sampūjya sā babhūva surēśvarī || 17 ||
dēvādibhiśca munibhi rmanubhi r-mānavāir-munē |
dēvyāśca maṅgaḷastōtraṃ yaḥ ś r̥ṇōti samāhitaḥ || 18 ||
tanmaṅgaḷaṃ bhavēcchaśvanna bhavēttadamaṅgaḷam |
vardhaṃtē tatputrapāutrā maṅgaḷaṃ ca dinē dinē || 19 ||
iti śrī maṅgaḷa caṇḍikā stōtraṃ sampūrṇam ||