శ్రీ మానసా దేవీ స్తోత్రం
మహేంద్ర ఉవాచ |
దేవి త్వాం స్తోతుమిచ్ఛామి సాధ్వీనాం ప్రవరాం వరామ్ |
పరాత్పరాం చ పరమాం న హి స్తోతుం క్షమోఽధునా || ౧ ||
స్తోత్రాణాం లక్షణం వేదే స్వభావాఖ్యానతః పరమ్ |
న క్షమః ప్రకృతిం వక్తుం గుణానాం తవ సువ్రతే || ౨ ||
శుద్ధసత్త్వస్వరూపా త్వం కోపహింసావివర్జితా |
న చ శప్తో మునిస్తేన త్యక్తయా చ త్వయా యతః || ౩ ||
త్వం మయా పూజితా సాధ్వి జననీ చ యథాఽదితిః |
దయారూపా చ భగినీ క్షమారూపా యథా ప్రసూః || ౪ ||
త్వయా మే రక్షితాః ప్రాణా పుత్రదారాః సురేశ్వరి |
అహం కరోమి త్వాం పూజ్యాం మమ ప్రీతిశ్చ వర్ధతే || ౫ ||
నిత్యం యద్యపి పూజ్యా త్వం భవేఽత్ర జగదంబికే |
తథాఽపి తవ పూజాం వై వర్ధయామి పునః పునః || ౬ ||
యే త్వామాషాఢసంక్రాంత్యాం పూజయిష్యంతి భక్తితః |
పంచమ్యాం మనసాఖ్యాయాం మాసాంతే వా దినే దినే || ౭ ||
పుత్రపౌత్రాదయస్తేషాం వర్ధంతే చ ధనాని చ |
యశస్వినః కీర్తిమంతో విద్యావంతో గుణాన్వితాః || ౮ ||
యే త్వాం న పూజయిష్యంతి నిందంత్యజ్ఞానతో జనాః |
లక్ష్మీహీనా భవిష్యంతి తేషాం నాగభయం సదా || ౯ ||
త్వం స్వర్గలక్ష్మీః స్వర్గే చ వైకుంఠే కమలా కలా |
నారాయణాంశో భగవాన్ జరత్కారుర్మునీశ్వరః || ౧౦ ||
తపసా తేజసా త్వాం చ మనసా ససృజే పితా |
అస్మాకం రక్షణాయైవ తేన త్వం మనసాభిధా || ౧౧ ||
మనసా దేవితుం శక్తా చాత్మనా సిద్ధయోగినీ |
తేన త్వం మనసాదేవీ పూజితా వందితా భవే || ౧౨ ||
యాం భక్త్యా మానసా దేవాః పూజయంత్యనిశం భృశమ్ |
తేన త్వాం మనసాదేవీం ప్రవదంతి పురావిదః || ౧౩ ||
సత్త్వరూపా చ దేవీ త్వం శశ్వత్సత్త్వనిషేవయా |
యో హి యద్భావయేన్నిత్యం శతం ప్రాప్నోతి తత్సమమ్ || ౧౪ ||
ఫలశ్రుతి
ఇంద్రశ్చ మనసాం స్తుత్వా గృహీత్వా భగినీం చ తామ్ |
నిర్జగామస్వ భవనం భూషావాస పరిచ్ఛదామ్ || ౧౫ ||
పుత్రేణ సార్ధం సా దేవీ చిరం తస్థౌ పితుర్గృహే |
భ్రాతృభిః పూజితా శశ్వన్మాన్యావన్ద్యా చ సర్వతః || ౧౬ ||
గోలోకాత్సురభీ బ్రహ్మంస్తత్రాగత్య సుపూజితామ్ |
ఇదం స్తోత్రం పుణ్యబీజం తాం సంపూజ్య చ యః పఠేత్ || ౧౭ ||
తస్య నాగభయం నాస్తి తస్యవంశే భవేచ్చ యః |
విషం భవేత్సుధాతుల్యం సిద్ధస్తోత్రం యదా పఠేత్ || ౧౮ ||
పంచలక్షజపేనైవ సిద్ధస్తోత్రో భవేన్నరః |
సర్పశాయీ భవేత్సోఽపి నిశ్చితం సర్పవాహనః || ౧౯ ||
ఇతి శ్రీ మానసా దేవీ స్తోత్రం సంపూర్ణం ||
śrī mānasā dēvī stōtram
mahendra uvāca |
dēvi tvāṃ stōtumicchāmi sādhvīnāṃ pravarāṃ varām |
parātparāṃ ca paramāṃ na hi stōtuṃ kṣamō-'dhunā || 1 ||
stōtrāṇāṃ lakṣaṇaṃ vēdē svabhāvākhyānataḥ param |
na kṣamaḥ prakr̥tiṃ vaktuṃ guṇānāṃ tava suvratē || 2 ||
śuddhasattvasvarūpā tvaṃ kōpahiṃsāvivarjitā |
na ca śaptō munistēna tyaktayā ca tvayā yataḥ || 3 ||
tvaṃ mayā pūjitā sādhvi jananī ca yathā'ditiḥ |
dayārūpā ca bhaginī kṣamārūpā yathā prasūḥ || 4 ||
tvayā mē rakṣitāḥ prāṇā putradārāḥ surēśvari |
ahaṃ karōmi tvāṃ pūjyāṃ mama prītiśca vardhatē || 5 ||
nityaṃ yadyapi pūjyā tvaṃ bhavē-'tra jagadambikē |
tathā'pi tava pūjāṃ vāi vardhayāmi punaḥ punaḥ || 6 ||
yē tvāmāṣāḍhasaṅkrāntyāṃ pūjayiṣyanti bhaktitaḥ |
pañcamyāṃ mānasākhyāyāṃ māsāntē vā dinē dinē || 7 ||
putrapāutrādayastēṣāṃ vardhantē ca dhanāni ca |
yaśasvinaḥ kīrtimantō vidyāvantō guṇānvitāḥ || 8 ||
yē tvāṃ na pūjayiṣyanti nindantyajñānatō janāḥ |
lakṣmīhīnā bhaviṣyanti tēṣāṃ nāgabhayaṃ sadā || 9 ||
tvaṃ svargalakṣmīḥ svargē ca vāikuṇṭhē kamalā kalā |
nārāyaṇāṃśō bhagavān jaratkārurmunīśvaraḥ || 10 ||
tapasā tējasā tvāṃ ca manasā sasr̥jē pitā |
asmākaṃ rakṣaṇāyāiva tēna tvaṃ mānasābhidhā || 11 ||
manasā dēvituṃ śaktā cātmanā siddhayōginī |
tēna tvaṃ mānasādēvī pūjitā vanditā bhavē || 12 ||
yāṃ bhaktyā mānasā dēvāḥ pūjayantyaniśaṃ bhr̥śam |
tēna tvāṃ mānasādēvīṃ pravadanti purāvidaḥ || 13 ||
sattvarūpā ca dēvī tvaṃ śaśvatsattvaniṣēvayā |
yō hi yadbhavāyēnnityaṃ śataṃ prāpnōti tatsamam || 14 ||
Phalaśruti
indraśca mānasāṃ stutvā gr̥hītvā bhaginīṃ ca tām |
nirjagāmasva bhavanaṃ bhūṣāvāsa paricchadām || 15 ||
putrēṇa sārdhaṃ sā dēvī ciraṃ tasthāu piturgr̥hē |
bhrātr̥bhiḥ pūjitā śaśvanmānyāvandā ca sarvataḥ || 16 ||
gōlōkātsurabhī brahmaṃstatrāgatya supūjitām |
idaṃ stōtraṃ puṇyabījaṃ tāṃ sampūjya ca yaḥ paṭhēt || 17 ||
tasya nāgabhayaṃ nāsti tasyavaṃśē bhavēcca yaḥ |
viṣaṃ bhavētsudhatulyaṃ siddhastōtraṃ yadā paṭhē || 18 ||
pañcalakṣajapēnāiva siddhastōtrō bhavēnnaraḥ |
sarpaśāyī bhavētsō-'pi niścitaṃ sarpavāhanaḥ || 19 ||
iti śrī mānasā dēvī stōtram sampūrṇam ||