శ్రీ శివ మానస పూజ స్తోత్రం
రత్నైః కల్పితమాసనం హిమజలైః స్నానం చ దివ్యాంబరం
నానారత్నవిభూషితం మృగమదామోదాంకితం చందనమ్ |
జాతీచంపకబిల్వపత్రరచితం పుష్పం చ ధూపం తథా
దీపం దేవ దయానిధే పశుపతే హృత్కల్పితం గృహ్యతామ్ || ౧ ||
సౌవర్ణే నవరత్నఖండరచితే పాత్రే ఘృతం పాయసం
భక్ష్యం పంచవిధం పయోదధియుతం రంభాఫలం పానకమ్ |
శాకానామయుతం జలం రుచికరం కర్పూరఖండోజ్జ్వలం
తాంబూలం మనసా మయా విరచితం భక్త్యా ప్రభో స్వీకురు || ౨ ||
ఛత్రం చామరయోర్యుగం వ్యజనకం చాదర్శకం నిర్మలం
వీణాభేరిమృదంగకాహలకలా గీతం చ నృత్యం తథా |
సాష్టాంగం ప్రణతిః స్తుతిర్బహువిధా హ్యేతత్సమస్తం మయా
సంకల్పేన సమర్పితం తవ విభో పూజాం గృహాణ ప్రభో || ౩ ||
ఆత్మా త్వం గిరిజా మతిః సహచరాః ప్రాణాః శరీరం గృహం
పూజా తే విషయోపభోగరచనా నిద్రా సమాధిస్థితిః |
సంచారః పదయోః ప్రదక్షిణవిధిః స్తోత్రాణి సర్వా గిరో
యద్యత్కర్మ కరోమి తత్తదఖిలం శంభో తవారాధనమ్ || ౪ ||
కరచరణ కృతం వాక్కాయజం కర్మజం వా
శ్రవణనయనజం వా మానసం వాపరాధమ్ |
విహితమవిహితం వా సర్వమేతత్ క్షమస్వ
జయ జయ కరుణాబ్ధే శ్రీమహాదేవశంభో || ౫ ||
ఇతి శ్రీమచ్ఛంకరాచార్య కృతం శ్రీ శివ మానసపూజా స్తోత్రం ||
Shri Shiva Manasa Puja Stotram
ratnaiḥ kalpitamāsanaṃ himajalaiḥ snānaṃ ca divyāmbaraṃ
nānāratnavibhūṣitaṃ mr̥gamadāmōdāṅkitaṃ candanam |
jātīcampakabilvapatraracitaṃ puṣpaṃ ca dhūpaṃ tathā
dīpaṃ dēva dayānidhē paśupatē hṛtkalpitaṃ gr̥hyatām || 1 ||
sauvarṇē navaratnakhaṇḍaracitē pātrē ghṛtaṃ pāyasaṃ
bhakṣyaṃ pañcavidhaṃ payōdadhiyutaṃ rambhāphalaṃ pānakam |
śākānāmayutaṃ jalaṃ rucikaraṃ karpūrakhaṇḍōjjvalaṃ
tāmbūlaṃ manasā mayā viracitaṃ bhaktyā prabhō svīkuru || 2 ||
chatraṃ cāmarayōryugaṃ vyajanakaṃ cādarśakaṃ nirmalaṃ
vīṇābhērimr̥daṅgakāhalakalā gītaṃ ca nr̥tyaṃ tathā |
sāṣṭāṅgaṃ praṇatiḥ stutirbahuvidhā hyētatsamastaṃ mayā
saṅkalpēna samarpitaṃ tava vibhō pūjāṃ gr̥hāṇa prabhō || 3 ||
ātmā tvaṃ girijā matiḥ sahacarāḥ prāṇāḥ śarīraṃ gr̥haṃ
pūjā tē viṣayōpabhōgaracanā nidrā samādhisthitiḥ |
sañcāraḥ padayōḥ pradakṣiṇavidhiḥ stōtrāṇi sarvā girō
yadyatkarma karōmi tattadakhilaṃ śambhō tavārādhanam || 4 ||
karacaraṇa kr̥taṃ vākkāyajaṃ karmajaṃ vā
śravaṇanayanajaṃ vā mānasaṃ vāparādham |
vihitamavihitaṃ vā sarvamētat kṣamasva
jaya jaya karuṇābdhē śrīmahādēvaśambhō || 5 ||
iti śrīmacchaṅkarācārya kr̥taṃ śrī śiva mānasapūjā stōtraṃ ||