శ్రీ సిద్ధి వినాయక స్తోత్రం
విఘ్నేశ విఘ్నచయఖండననామధేయ
శ్రీశంకరాత్మజ సురాధిపవంద్యపాద |
దుర్గామహావ్రతఫలాఖిలమంగలాత్మన్
విఘ్నం మమాపహర సిద్ధివినాయక త్వమ్ || ౧ ||
సత్పద్మరాగమణివర్ణశరీరకాంతిః
శ్రీసిద్ధిబుద్ధిపరిచర్చితకుంకుమశ్రీః |
దక్షస్తనే వలయితాతిమనోజ్ఞశుండో
విఘ్నం మమాపహర సిద్ధివినాయక త్వమ్ || ౨ ||
పాశాంకుశాబ్జపరశూంశ్చ దధచ్చతుర్భి-
-ర్దోర్భిశ్చ శోణకుసుమస్త్రగుమాంగజాతః |
సిందూరశోభితలలాటవిధుప్రకాశో
విఘ్నం మమాపహర సిద్ధివినాయక త్వమ్ || ౩ ||
కార్యేషు విఘ్నచయభీతవిరంచిముఖ్యైః
సంపూజితః సురవరైరపి మోదకాద్యైః |
సర్వేషు చ ప్రథమమేవ సురేషు పూజ్యో
విఘ్నం మమాపహర సిద్ధివినాయక త్వమ్ || ౪ ||
శీఘ్రాంచనస్ఖలనతుంగరవోర్ధ్వకంఠ
స్థూలేందురుద్రగణహాసితదేవసంఘః |
శూర్పశ్రుతిశ్చ పృథువర్తులతుంగతుందో
విఘ్నం మమాపహర సిద్ధివినాయక త్వమ్ || ౫ ||
యజ్ఞోపవీతపదలంభితనాగరాజో
మాసాదిపుణ్యదదృశీకృతఋక్షరాజః |
భక్తాభయప్రద దయాలయ విఘ్నరాజ
విఘ్నం మమాపహర సిద్ధివినాయక త్వమ్ || ౬ ||
సద్రత్నసారతతిరాజితసత్కిరీటః
కౌసుంభచారువసనద్వయ ఊర్జితశ్రీః |
సర్వత్ర మంగలకరస్మరణప్రతాపో
విఘ్నం మమాపహర సిద్ధివినాయక త్వమ్ || ౭ ||
దేవాంతకాద్యసురభీతసురార్తిహర్తా
విజ్ఞానబోధనవరేణ తమోఽపహర్తా |
ఆనందితత్రిభువనేశ కుమారబంధో
విఘ్నం మమాపహర సిద్ధివినాయక త్వమ్ || ౮ ||
ఇతి శ్రీముద్గలపురాణే శ్రీ సిద్ధి వినాయక స్తోత్రం |
శ్రీ సిద్ధి వినాయకార్పణమస్తు ||
Siddhi Vinayaka Stotram
vighnēśa vighnacayakhaṇḍananāmadhēya
śrīśaṅkarātmaja surādhipavandyapāda |
durgāmahāvrataphalākhila maṅgalātman
vighnaṃ mamāpahara siddhivināyaka tvam || 1 ||
satpadmarāgamaṇivarṇaśarīrakāntiḥ
śrīsiddhibuddhiparicarcitakuṅkumaśrīḥ |
dakṣastanē valayitātimanōjñaśuṇḍō
vighnaṃ mamāpahara siddhivināyaka tvam || 2 ||
pāśāṅkuśābjaparaśūṃśca dadhaccaturbhi-
-rdōrbhiśca śōṇakusumastragumāṅgajātaḥ |
sindūraśōbhitalalāṭavidhu-prakāśō
vighnaṃ mamāpahara siddhivināyaka tvam || 3 ||
kāryēṣu vighnacayabhītaviriñcimukhyaiḥ
sampūjitaḥ suravarairapi mōdakādyaiḥ |
sarvēṣu ca prathamamēva surēṣu pūjyō
vighnaṃ mamāpahara siddhivināyaka tvam || 4 ||
śīghrāñcanaskhalanatuṅgaravōrdhvakaṇṭha
sthūlēndurudragaṇahāsitadēvasaṅghaḥ |
śūrpaśrutiśca pṛthuvartulatuṅgatuṇḍō
vighnaṃ mamāpahara siddhivināyaka tvam || 5 ||
yajñōpavītapadalambhitanāgarājō
māsādipuṇyadadṛśīkṛta-ṛkṣarājaḥ |
bhaktābhayaprada dayālaya vighnarāja
vighnaṃ mamāpahara siddhivināyaka tvam || 6 ||
sadratnasāratatirājitasatkirīṭaḥ
kausumbhacāruvasanadvaya ūrjitaśrīḥ |
sarvatra maṅgalakaras-smaraṇapratāpō
vighnaṃ mamāpahara siddhivināyaka tvam || 7 ||
dēvāntakādyasurabhītasurārtihartā
vijñānabōdhanavarēṇa tamō’pahartā |
ānanditatribhuvanēśa kumārabandhō
vighnaṃ mamāpahara siddhivināyaka tvam || 8 ||
iti śrīmudgalapurāṇē śrī siddhivināyaka stōtram |