మీనాక్షీ పంచరత్నం
ఉద్యద్భానుసహస్రకోటిసదృశాం కేయూరహారోజ్జ్వలాం
బింబోష్ఠీం స్మితదంతపంక్తిరుచిరాం పీతాంబరాలంకృతామ్ |
విష్ణుబ్రహ్మసురేంద్రసేవితపదాం తత్త్వస్వరూపాం శివాం
మీనాక్షీం ప్రణతోఽస్మి సంతతమహం కారుణ్యవారాంనిధిమ్ || ౧ ||
ముక్తాహారలసత్కిరీటరుచిరాం పూర్ణేందువక్త్రప్రభాం
శింజన్నూపురకింకిణీమణిధరాం పద్మప్రభాభాసురామ్ |
సర్వాభీష్టఫలప్రదాం గిరిసుతాం వాణీరమాసేవితాం
మీనాక్షీం ప్రణతోఽస్మి సంతతమహం కారుణ్యవారాంనిధిమ్ || ౨ ||
శ్రీవిద్యాం శివవామభాగనిలయాం హ్రీంకారమంత్రోజ్జ్వలాం
శ్రీచక్రాంకితబిందుమధ్యవసతిం శ్రీమత్సభానాయకీమ్ |
శ్రీమత్షణ్ముఖవిఘ్నరాజజననీం శ్రీమజ్జగన్మోహినీం
మీనాక్షీం ప్రణతోఽస్మి సంతతమహం కారుణ్యవారాంనిధిమ్ || ౩ ||
శ్రీమత్సుందరనాయకీం భయహరాం జ్ఞానప్రదాం నిర్మలాం
శ్యామాభాం కమలాసనార్చితపదాం నారాయణస్యానుజామ్ |
వీణావేణుమృదంగవాద్యరసికాం నానావిధాడంబికాం
మీనాక్షీం ప్రణతోఽస్మి సంతతమహం కారుణ్యవారాంనిధిమ్ || ౪ ||
నానాయోగిమునీంద్రహృన్నివసతీం నానార్థసిద్ధిప్రదాం
నానాపుష్పవిరాజితాంఘ్రియుగళాం నారాయణేనార్చితామ్ |
నాదబ్రహ్మమయీం పరాత్పరతరాం నానార్థతత్త్వాత్మికాం
మీనాక్షీం ప్రణతోఽస్మి సంతతమహం కారుణ్యవారాంనిధిమ్ || ౫ ||
ఇతి శ్రీమచ్ఛంకరభగవతః కృతౌ మీనాక్షీ పంచరత్నం సంపూర్ణం ||
mīnākṣī pañcaratnam
udyadbhānusahasrakōṭisadr̥śāṃ kēyūrahārōjjvalāṃ
biṃbōṣṭhīṃ smitadantapaṅktirucirāṃ pītāmbarālaṅkr̥tām |
viṣṇubrahmasurēndrasēvitapadāṃ tattvasvarūpāṃ śivāṃ
mīnākṣīṃ praṇatō'smi saṃtatamahaṃ kāruṇyavārāṃnidhim || 1 ||
muktāhāralasatkirīṭarucirāṃ pūrṇēnduvaktraprabhāṃ
śiñjannūpurakiṅkiṇīmaṇidharāṃ padmaprabhābhāsurām |
sarvābhīṣṭhaphalapradāṃ girisutāṃ vāṇīramāsēvitāṃ
mīnākṣīṃ praṇatō'smi saṃtatamahaṃ kāruṇyavārāṃnidhim || 2 ||
śrīvidyāṃ śivavāmabhāganilayāṃ hrīṃkāramaṇtrōjjvalāṃ
śrīcakrāṅkitabiṃdumadhyavasatiṃ śrīmatsabhānāyakīm |
śrīmatṣaṇmukhavighnarājajananīṃ śrīmajjanmōhinīṃ
mīnākṣīṃ praṇatō'smi saṃtatamahaṃ kāruṇyavārāṃnidhim || 3 ||
śrīmatsundaranāyakīṃ bhayaharāṃ jñānapradāṃ nirmalāṃ
śyāmābhāṃ kamalāsanārcitapadāṃ nārāyaṇasyānujām |
vīṇāvēṇumr̥daṅgavādyarasikāṃ nānāvidhāḍambikāṃ
mīnākṣīṃ praṇatō'smi saṃtatamahaṃ kāruṇyavārāṃnidhim || 4 ||
nānāyōgimunīndrahr̥nnivasatīṃ nānārthasiddhipradāṃ
nānāpuṣpavirājitāṅghriyugaḷāṃ nārāyaṇēnārcitām |
nādabrahmamayīṃ parātparataraṃ nānārthatattvātmakāṃ
mīnākṣīṃ praṇatō'smi saṃtatamahaṃ kāruṇyavārāṃnidhim || 5 ||
iti śrīmacchaṅkarabhagavataḥ kr̥tāu mīnākṣī pañcaratnaṃ sampūrṇam ||