మాతృ పంచకం
ఆస్తాం తావదియం ప్రసూతిసమయే దుర్వారశూలవ్యథా |
నైరుజ్యం తనుశోషణం మలమయీ శయ్యా చ సాంవత్సరీ |
ఏకస్యాపి న గర్భభారభరణక్లేశస్య యస్య క్షమః |
దాతుం నిష్కృతిమున్నతోఽపి తనయస్తస్యై జనన్యై నమః || ౧ ||
గురుకులముపసృత్య స్వప్నకాలే తు దృష్ట్వా |
యతిసముచితవేషం ప్రారుదో మాం త్వముచ్చైః |
గురుకులముథ సర్వం ప్రారుదత్తే సమక్షం |
సపది చరణయోస్తే మాతరస్తు ప్రణామః || ౨ ||
న దత్తం మాతస్తే మరణసమయే తోయమపి వా |
స్వధా వా నో దత్తా మరణదివసే శ్రాద్ధవిధినా |
న జప్తో మాతస్తే మరణసమయే తారకమనుః |
అకాలే సంప్రాప్తే మయి కురు దయాం మాతరతులామ్ || ౩ ||
ముక్తామణిస్త్వం నయనం మమేతి |
రాజేతి జీవేతి చిరం సుత త్వమ్ |
ఇత్యుక్తవత్యాస్తవ వాచి మాతః |
దదామ్యహం తండులమేష శుష్కమ్ || ౪ ||
అంబేతి తాతేతి శివేతి తస్మిన్ |
ప్రసూతికాలే యదవోచ ఉచ్చైః |
కృష్ణేతి గోవింద హరే ముకుందే- |
-త్యహో జనన్యై రచితోఽయమంజలిః || ౫ ||
ఇతి శ్రీ మచ్ఛంకరాచార్య విరచితం మాతృ పంచకం సంపూర్ణం ||
mātr̥ pañcakam
āstāṃ tāvadiyaṃ prasūtisamayē durvāraśūlavyathā
nairujyaṃ tanuśōṣaṇaṃ malamayī śayyā ca sāṃvatsarī |
ēkasyāpi na garbhabhārabharaṇaklēśasya yasya kṣamaḥ
dātuṃ niṣkr̥timunnatō'pi tanayastas-yāi jananyāi namaḥ || 1 ||
gurukulamupas r̥tya svapnakālē tu dr̥ṣṭvā
yatisamucitavēṣaṃ prārudō māṃ tvamuccāiḥ |
gurukulamatha sarvaṃ prārudattē samakṣaṃ
sapadi caraṇayōstē mātarastu praṇāmaḥ || 2 ||
na dattaṃ mātas-tē maraṇasamayē tōyamapi vā
svadhā vā nō dattā maraṇadivasē śrāddhavidhinā |
na japtō mātas-tē maraṇasamayē tārakamanuḥ
akālē samprāptē mayi kuru dayāṃ mātaratulām || 3 ||
muktāmaṇistvaṃ nayanaṃ mamēti
rājēti jīvēti ciraṃ suta tvam |
ityuktavatyāstava vāci mātaḥ
dadāmyahaṃ taṇḍulamēṣa śuṣkam || 4 ||
ambēti tātēti śivēti tasmin
prasūtikālē yadavōca uccāiḥ |
kr̥ṣṇēti gōvinda harē mukundē-
-tyahō jananyāi racitō'yamañjaliḥ || 5 ||
iti śrīmacchaṅkarācārya viracitaṃ mātr̥ pañcakam ||