గంగాష్టకం
భగవతి తవ తీరే నీరమాత్రాశనోఽహం |
విగతవిషయతృష్ణః కృష్ణమారాధయామి |
సకల కలుషభంగే స్వర్గసోపానసంగే |
తరలతరతరంగే దేవి గంగే ప్రసీద || ౧ ||
భగవతి భవలీలా మౌళిమాలే తవాంభః |
కణమణుపరిమాణం ప్రాణినో యే స్పృశంతి |
అమరనగరనారీ చామర గ్రాహిణీనాం |
విగత కలికలంకాతంకమంకే లుఠంతి || ౨ ||
బ్రహ్మాండం ఖండయంతీ హరశిరసి జటావల్లిముల్లాసయంతీ |
స్వర్లోకాదాపతంతీ కనకగిరిగుహాగండశైలాత్ స్ఖలంతీ |
క్షోణీపృష్ఠే లుఠంతీ దురితచయచమూర్నిర్భరం భర్త్సయంతీ |
పాథోధిం పూరయంతీ సురనగరసరిత్పావనీ నః పునాతు || ౩ ||
మజ్జన్మాతంగ కుంభచ్యుత మదమదిరామోదమత్తాలిజాలం |
స్నానైః సిద్ధాంగనానాం కుచయుగ విలసత్కుంకుమాసంగపింగమ్ |
సాయం ప్రాతర్మునీనాం కుశకుసుమచయైశ్ఛిన్నతీరస్థనీరం |
పాయాన్నో గాంగమంభః కరికలభ కరాక్రాంత రంగస్తరంగమ్ || ౪ ||
ఆదావాది పితామహస్య నియమ వ్యాపార పాత్రే జలం |
పశ్చాత్పన్నగశాయినో భగవతః పాదోదకం పావనమ్ |
భూయః శంభుజటావిభూషణ మణిర్జహ్నోర్మహర్షేరియం |
కన్యా కల్మషనాశినీ భగవతీ భాగీరథీ దృశ్యతే || ౫ ||
శైలేంద్రాదవతారిణీ నిజజలే మజ్జజ్జనోత్తారిణీ |
పారావారవిహారిణీ భవభయశ్రేణీ సముత్సారిణీ |
శేషాంగైరనుకారిణీ హరశిరోవల్లీదళాకారిణీ |
కాశీప్రాంతవిహారిణీ విజయతే గంగా మనోహారిణీ || ౬ ||
కుతో వీచిర్వీచిస్తవ యది గతా లోచనపథం |
త్వమాపీతా పీతాంబరపురవాసం వితరసి |
త్వదుత్సంగే గంగే పతతి యది కాయస్తనుభృతాం |
తదా మాతః శాంతక్రతవపదలాభోఽప్యతిలఘుః || ౭ ||
గంగే త్రైలోక్యసారే సకలసురవధూధౌతవిస్తీర్ణతోయే |
పూర్ణబ్రహ్మస్వరూపే హరిచరణరజోహారిణి స్వర్గమార్గే |
ప్రాయశ్చితం యది స్యాత్తవ జలకణికా బ్రహ్మహత్యాది పాపే |
కస్త్వాం స్తోతుం సమర్థః త్రిజగదఘహరే దేవి గంగే ప్రసీద || ౮ ||
మాతర్జాహ్నవీ శంభుసంగమిలితే మౌళౌ నిధాయాంజలిం |
త్వత్తీరే వపుషోఽవసానసమయే నారాయణాంఘ్రిద్వయమ్ |
సానందం స్మరతో భవిష్యతి మమ ప్రాణప్రయాణోత్సవే |
భూయాద్భక్తిరవిచ్యుతా హరిహరాద్వైతాత్మికా శాశ్వతీ || ౯ ||
ఫలశ్రుతి
గంగాష్టకమిదం పుణ్యం యః పఠేత్ప్రయతో నరః |
సర్వపాపవినిర్ముక్తో విష్ణులోకం స గచ్ఛతి || ౧౦ ||
ఇతి శ్రీ గంగాష్టకం సంపూర్ణం ||
gaṅgāṣṭakam
bhagavati tava tīrē nīramātrāśanō'haṃ
vigataviṣayatr̥ṣṇaḥ kr̥ṣṇamārādhayāmi |
sakala kaluṣabhaṅgē svargasōpānasaṅgē
taralatarataraṅgē dēvi gaṅgē prasīda || 1 ||
bhagavati bhavalīlā māuḷimālē tavāmbhaḥ
kaṇamaṇuparimāṇaṃ prāṇinō yē spr̥śanti |
amaranagaranārī cāmara grāhiṇīnāṃ
vigata kalikalaṅkātaṅkamaṅkē luṭhanti || 2 ||
brahmāṇḍaṃ khaṇḍayantī haraśirasi jaṭāvallimullāsayantī
svarlōkādāpatantī kanakağiriguhāgaṇḍaśāilāt skhalantī |
kṣōṇīpr̥ṣṭʰē luṭhanti duritacayacamūrnirbharaṃ bhartsayantī
pāthōdhiṃ pūrayantī suranagarasaritpāvanī naḥ punātu || 3 ||
majjanmātaṅga kumbhacyuta madamadirāmōdamattālijālaṃ
snānāiḥ siddhāṅganānāṃ kucayuga vilasatkuṅkumāsaṅgapiṅgam |
sāyaṃ prātarmunīnāṃ kuśakusumacayāiśchinnatīrasthanīraṃ
pāyānnō gāṅgamambhaḥ karikalabha karākrānta raṅgastaraṅgam || 4 ||
ādāuvādi pitāmahasya niyama vyāpāra pātrē jalaṃ
paścātpannagaśāyinō bhagavataḥ pādōdakaṃ pāvanam |
bhūyaḥ śambhujaṭāvibhūṣaṇa maṇirjahnōrmaharṣēriyaṃ
kanyā kalmaṣanāśinī bhagavatī bhāgīrathī dr̥śyatē || 5 ||
śāilēndrādavatāriṇī nijajalē majjajjanōttāriṇī
pāravāravihāriṇī bhavabhayaśrēṇī samutsāriṇī |
śēṣāṅgāiranukāriṇī haraśirōvallīdaḷākāriṇī
kāśīprāntavihāriṇī vijayatē gaṅgā manōhāriṇī || 6 ||
kutō vīcirvīcistava yadi gatā lōcanapathaṃ
tvamāpītā pītāmbarapuravāsaṃ vitarasi |
tvadutsaṅgē gaṅgē patati yadi kāyastanubhr̥tāṃ
tadā mātaḥ śāntakratavapadalābhō'pyatilaghuḥ || 7 ||
gaṅgē trāilōkyasārē sakalasuravadhūdhāutavistīrṇatōyē
pūrṇabrahmasvarūpē haricaraṇarajōhāriṇi svargamārgē |
prāyaścitaṃ yadi syāttava jalakaṇikā brahmahatyādi pāpē
kastvāṃ stōtuṃ samartʰaḥ trijagadaghaharē dēvi gaṅgē prasīda || 8 ||
mātarjāhnavī śambhusangamilitē māuḷāu nidʰāyāñjaliṃ
tvattīrē vapuṣō'vasānasamayē nārāyaṇāṅghridvayam |
sānandaṃ smaratō bhaviṣyati mama prāṇaprayāṇōtsavē
bhūyādbhaktiravicyutā hariharādvāitātmikā śāśvatī || 9 ||
Phalaśruti
gaṅgāṣṭakamidaṃ puṇyaṃ yaḥ paṭʰēt-prayatō naraḥ |
sarvapāpaviniirmuktō viṣṇulōkaṃ sa gaccḥati || 10 ||