దశశ్లోకీ స్తుతిః
సాంబో నః కులదైవతం పశుపతే సాంబ త్వదీయా వయం
సాంబం స్తౌమి సురాసురోరగగణాః సాంబేన సంతారితాః |
సాంబాయాస్తు నమో మయా విరచితం సాంబాత్పరం నో భజే
సాంబస్యానుచరోఽస్మ్యహం మమ రతిః సాంబే పరబ్రహ్మణి || ౧ ||
విష్ణ్వాద్యాశ్చ పురత్రయం సురగణా జేతుం న శక్తాః స్వయం
యం శంభుం భగవన్వయం తు పశవోఽస్మాకం త్వమేవేశ్వరః |
స్వస్వస్థాననియోజితాః సుమనసః స్వస్థా బభూవుస్తత-
-స్తస్మిన్మే హృదయం సుఖేన రమతాం సాంబే పరబ్రహ్మణి || ౨ ||
క్షోణీ యస్య రథో రథాంగయుగళం చంద్రార్కబింబద్వయం
కోదండః కనకాచలో హరిరభూద్బాణో విధిః సారథిః |
తూణీరో జలధిర్హయాః శ్రుతిచయో మౌర్వీ భుజంగాధిప-
-స్తస్మిన్మే హృదయం సుఖేన రమతాం సాంబే పరబ్రహ్మణి || ౩ ||
యేనాపాదితమంగజాంగభసితం దివ్యాంగరాగైః సమం
యేన స్వీకృతమబ్జసంభవశిరః సౌవర్ణపాత్రైః సమమ్ |
యేనాంగీకృతమచ్యుతస్య నయనం పూజారవిందైః సమం
తస్మిన్మే హృదయం సుఖేన రమతాం సాంబే పరబ్రహ్మణి || ౪ ||
గోవిందాదధికం న దైవతమితి ప్రోచ్చార్య హస్తావుభా-
-వుద్ధృత్యాథ శివస్య సంనిధిగతో వ్యాసో మునీనాం వరః |
యస్య స్తంభితపాణిరానతికృతా నందీశ్వరేణాభవ-
-త్తస్మిన్మే హృదయం సుఖేన రమతాం సాంబే పరబ్రహ్మణి || ౫ ||
ఆకాశశ్చికురాయతే దశదిశాభోగో దుకూలాయతే
శీతాంశుః ప్రసవాయతే స్థిరతరానందః స్వరూపాయతే |
వేదాంతో నిలయాయతే సువినయో యస్య స్వభావాయతే
తస్మిన్మే హృదయం సుఖేన రమతాం సాంబే పరబ్రహ్మణి || ౬ ||
విష్ణుర్యస్య సహస్రనామనియమాదంభోరుహాణ్యర్చయ-
-న్నేకోనోపచితేషు నేత్రకమలం నైజం పదాబ్జద్వయే |
సంపూజ్యాసురసంహతిం విదలయంస్త్రైలోక్యపాలోఽభవ-
-త్తస్మిన్మే హృదయం సుఖేన రమతాం సాంబే పరబ్రహ్మణి || ౭ ||
శౌరిం సత్యగిరం వరాహవపుషం పాదాంబుజాదర్శనే
చక్రే యో దయయా సమస్తజగతాం నాథం శిరోదర్శనే |
మిథ్యావాచమపూజ్యమేవ సతతం హంసస్వరూపం విధిం
తస్మిన్మే హృదయం సుఖేన రమతాం సాంబే పరబ్రహ్మణి || ౮ ||
యస్యాసన్ధరణీజలాగ్నిపవనవ్యోమార్కచంద్రాదయో
విఖ్యాతాస్తనవోఽష్టధా పరిణతా నాన్యత్తతో వర్తతే |
ఓంకారార్థవివేచనీ శ్రుతిరియం చాచష్ట తుర్యం శివం
తస్మిన్మే హృదయం సుఖేన రమతాం సాంబే పరబ్రహ్మణి || ౯ ||
విష్ణుబ్రహ్మసురాధిపప్రభృతయః సర్వేఽపి దేవా యదా
సంభూతాజ్జలధేర్విషాత్పరిభవం ప్రాప్తాస్తదా సత్వరమ్ |
తానార్తాంశరణాగతానితి సురాన్యోఽరక్షదర్ధక్షణా-
-త్తస్మిన్మే హృదయం సుఖేన రమతాం సాంబే పరబ్రహ్మణి || ౧౦ ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ దశశ్లోకీస్తుతిః సంపూర్ణా ||
Dashashloki Stuti
sāmbō naḥ kuladaivataṃ paśupatē sāmba tvadīyā vayaṃ
sāmbaṃ staumi surāsurōragagaṇāḥ sāmbēna saṇtāritāḥ |
sāmbāyāstu namō mayā viracitaṃ sāmbātparaṃ nō bhajē
sāmbaśyānucarō’syahaṃ mama ratiḥ sāmbē parabrahmaṇi || 1 ||
viṣṇvādyāśca puratrayaṃ suragaṇā jētuṃ na śaktāḥ swayaṃ
yaṃ śambhuṃ bhagavanvayaṃ tu paśavō’smākaṃ twamēvēśvaraḥ |
swaswasthānaniyōjitāḥ sumanasaḥ swasthā babhūvustata-
-stasminmē hr̥dayaṃ sukhēna ramatāṃ sāmbē parabrahmaṇi || 2 ||
kṣōṇī yasya rathō rathāṅgayugaḷaṃ caṇdrārkabimbadwayaṃ
kōdaṇḍaḥ kanakācalō harirabhūdbāṇō vidhiḥ sārathiḥ |
tūṇīrō jaladhirhayāḥ śruticayō maurvī bhujaṅgādhipa-
-tasminmē hr̥dayaṃ sukhēna ramatāṃ sāmbē parabrahmaṇi || 3 ||
yēnāpāditamaṅgajāṅgabhasitaṃ divyāṅgarāgaiḥ samaṃ
yēna swīkṛtamabjasaṃbhavaśiraḥ sauvarṇapātraiḥ samam |
yēnāṅgīkṛtamacyutasya nayanaṃ pūjāravindaiḥ samaṃ
tasminmē hr̥dayaṃ sukhēna ramatāṃ sāmbē parabrahmaṇi || 4 ||
gōviṇdādadhikaṃ na daivatamiti prōccārya hastāvubhā-
-vuddhr̥tyātha śivasya saṃnidhigatō vyāsō munīnāṃ varaḥ |
yasya staṃbhitapāṇirānatikṛtā naṇdīśvarēṇābhava-
-ttasminmē hr̥dayaṃ sukhēna ramatāṃ sāmbē parabrahmaṇi || 5 ||
ākāśaścikurāyatē daśadiśābhōgō dukūlāyatē
śītāṃśuḥ prasavāyatē sthiratārānanadaḥ swarūpāyatē |
vēdāṇtō nilayāyatē suvinayō yasya swabhāvāyatē
tasminmē hr̥dayaṃ sukhēna ramatāṃ sāmbē parabrahmaṇi || 6 ||
viṣṇuryasya sahasranāmaniyamādaṃbhōruhāṇyarccaya-
-nnēkōnōpacitēṣu nētrakamalaṃ naijaṃ padābjadwayē |
saṃpūjyāsurasaṃhatiṃ vidalayaṃstrailōkyapālō’bhava-
-ttasminmē hr̥dayaṃ sukhēna ramatāṃ sāmbē parabrahmaṇi || 7 ||
śauriṃ satyagiraṃ varāhavapuṣaṃ pādāṃbujādarśanē
cakrē yō dayayā samastajagatāṃ nāthaṃ śirōdarśanē |
mithyāvācamapūjyamēva satataṃ haṃsaswarūpaṃ vidhiṃ
tasminmē hr̥dayaṃ sukhēna ramatāṃ sāmbē parabrahmaṇi || 8 ||
yasyāsaṇdharaṇījalāgnipavanavyōmārkacaṇdrādayō
vikhyātāstaṇavō’ṣṭadhā pariṇatā nānyattatō vartatē |
ōṅkārārtthavivēcinī śrutiriyaṃ cācaṣṭa turyaṃ śivaṃ
tasminmē hr̥dayaṃ sukhēna ramatāṃ sāmbē parabrahmaṇi || 9 ||
viṣṇubrahmasurādhipaprabhṛtayaḥ sarvē’pi dēvā yadā
saṃbhūtāj-jaladhērviṣātpari bhavaṃ prāptāstadā satwaram |
tānārtāṃśaraṇāgatāṇiti surānyō’raxadardhakṣaṇā-
-tasminmē hr̥dayaṃ sukhēna ramatāṃ sāmbē parabrahmaṇi || 10 ||
iti śrīmacchaṅkarabhagavataḥ kṛtau daśaślōkīstutiḥ saṃpūrṇā ||