శ్రీ దక్షిణామూర్తి నవరత్నమాలా స్తోత్రం
మూలేవటస్య మునిపుంగవసేవ్యమానం
ముద్రావిశేషముకుళీకృతపాణిపద్మమ్ |
మందస్మితం మధురవేషముదారమాద్యం
తేజస్తదస్తు హృదయే తరుణేందుచూడమ్ || ౧ ||
శాంతం శారదచంద్రకాంతిధవళం చంద్రాభిరామాననం
చంద్రార్కోపమకాంతికుండలధరం చంద్రావదాతాంశుకమ్ |
వీణాం పుస్తకమక్షసూత్రవలయం వ్యాఖ్యానముద్రాం కరై-
ర్బిభ్రాణం కలయే హృదా మమ సదా శాస్తారమిష్టార్థదమ్ || ౨ ||
కర్పూరగాత్రమరవిందదళాయతాక్షం
కర్పూరశీతలహృదం కరుణావిలాసమ్ |
చంద్రార్ధశేఖరమనంతగుణాభిరామ-
మింద్రాదిసేవ్యపదపంకజమీశమీడే || ౩ ||
ద్యుద్రోరధస్స్వర్ణమయాసనస్థం
ముద్రోల్లసద్బాహుముదారకాయమ్ |
సద్రోహిణీనాథకళావతంసం
భద్రోదధిం కంచన చింతయామః || ౪ ||
ఉద్యద్భాస్కరసన్నిభం త్రిణయనం శ్వేతాంగరాగప్రభం
బాలం మౌంజిధరం ప్రసన్నవదనం న్యగ్రోధమూలేస్థితమ్ |
పింగాక్షం మృగశాబకస్థితికరం సుబ్రహ్మసూత్రాకృతీం
భక్తానామభయప్రదం భయహరం శ్రీదక్షిణామూర్తికమ్ || ౫ ||
శ్రీకాంత ద్రుహిణోపమన్యు తపన స్కందేంద్ర నంద్యాదయః
ప్రాచీనాగురవోఽపి యస్య కరుణాలేశాద్గతాగౌరవమ్ |
తం సర్వాదిగురుం మనోజ్ఞవపుషం మందస్మితాలంకృతం
చిన్ముద్రాకృతిముగ్ధపాణినళినం చిత్తం శివం కుర్మహే || ౬ ||
కపర్దినం చంద్రకళావతంసం
త్రిణేత్రమిందు ప్రతిమాక్షితాజ్వలమ్ |
చతుర్భుజం జ్ఞానదమక్షసూత్ర-
పుస్తాగ్నిహస్తం హృది భావయేచ్ఛివమ్ || ౭ ||
వామోరూపరిసంస్థితాం గిరిసుతామన్యోన్యమాలింగితాం
శ్యామాముత్పలధారిణీం శశినిభాం చాలోకయంతం శివమ్ |
ఆశ్లిష్టేన కరేణ పుస్తకమథో కుంభం సుధాపూరితం
ముద్రాం జ్ఞానమయీం దధానమపరైర్ముక్తాక్షమాలం భజే || ౮ ||
వటతరు నికటనివాసం పటుతర విజ్ఞాన ముద్రిత కరాబ్జమ్ |
కంచన దేశికమాద్యం కైవల్యానందకందళం వందే || ౯ ||
ఇతి శ్రీ దక్షిణామూర్తి నవరత్నమాలా స్తోత్రం |
Sri Dakshinamurthy Navaratna Mala Stotram
mūlēvaṭasya munipuṅgavasēvyamānaṁ
mudrāviśēṣamukulīkr̥tapāṇipadmam |
mandasmitaṁ madhuravēṣamudāramādyaṁ
tējastadastu hr̥di mē taruṇēnducūḍam || 1 ||
śāntaṁ śāradacandrakāntidhavalaṁ candrābhirāmānanaṁ
candrārkōpamakāntikuṇḍaladharaṁ candrāvadātāṁśukam |
vīṇāpustakamakṣasūtravalayaṁ vyākhyānamudrāṁ karai-
-rbibhrāṇaṁ kalayē hr̥dā mama sadā śāstāramiṣṭārthadam || 2 ||
karpūrapātramaravindadalāyatākṣaṁ
karpūraśītalahr̥daṁ karuṇāvilāsam |
candrārdhaśēkharamanantaguṇābhirāma-
-mindrādisēvyapadapaṅkajamīśamīḍē || 3 ||
dyudrōradhaḥ svarṇamayāsanasthaṁ
mudrōllasadbāhumudārakāyam |
sadrōhiṇīnāthakalāvataṁsaṁ
bhadrōdadhiṁ kañcana cintayāmaḥ || 4 ||
udyadbhāskarasannibhaṁ triṇayanaṁ śvētāṅgarāgaprabhaṁ
bālaṁ mauñjidharaṁ prasannavadanaṁ nyagrōdhamūlēsthitam |
piṅgākṣaṁ mr̥gaśābakasthitikaraṁ subrahmasūtrākr̥tiṁ
bhaktānāmabhayapradaṁ bhayaharaṁ śrīdakṣiṇāmūrtikam || 5 ||
śrīkāntadruhiṇōpamanyu tapana skandēndranandyādayaḥ
prācīnāguravō:’pi yasya karuṇālēśādgatāgauravam |
taṁ sarvādiguruṁ manōjñavapuṣaṁ mandasmitālaṅkr̥taṁ
cinmudrākr̥timugdhapāṇinalinaṁ cittē śivaṁ kurmahē || 6 ||
kapardinaṁ candrakalāvataṁsaṁ
triṇētramindupatimānanōjvalam |
caturbhujaṁ jñānadamakṣasūtra-
-pustāgnihastaṁ hr̥di bhāvayēcchivam || 7 ||
vāmōrūparisaṁsthitāṁ girisutāmanyōnyamāliṅgitāṁ
śyāmāmutpaladhāriṇīṁ śaśinibhāṁ cālōkayantaṁ śivam |
āśliṣṭēna karēṇa pustakamathō kumbhaṁ sudhāpūritaṁ
mudrāṁ jñānamayīṁ dadhānamaparairmuktākṣamālaṁ bhajē || 8 ||
vaṭatarunikaṭanivāsaṁ
paṭutaravijñānamudritakarābjam |
kañcanadēśikamādyaṁ
kaivalyānandakandalaṁ vandē || 9 ||
iti śrī dakṣiṇāmūrti navaratnamālā stōtram ||