శ్రీమద్రామాయణము - బాలకాండ
ఏకసప్తతితమ సర్గము
ఏవం బ్రువాణం జనక: ప్రత్యువాచ కృతాఞ్జలి:
శ్రోతుమర్హసి భద్రం తే కులం న: పరికీర్తితమ్ 1
ప్రదానే హి మునిశ్రేష్ఠ కులం నిరవశేషత:
వక్తవ్యం కులజాతేన తన్నిబోధ మహామునే! 2
రాజాభూత్ త్రిషు లోకేషు విశ్రుత స్స్వేన కర్మణా
నిమి: పరమధర్మాత్మా సర్వసత్త్వవతాం వర: 3
తస్య పుత్రోమిథిర్నామ మిథిలా యేన నిర్మితా
ప్రథమో జనకో నామ జనకాదప్యుదావసు: 4
ఉదావసోస్తు ధర్మాత్మా జాతో వై నన్దివర్ధన:
నన్దివర్ధనపుత్రస్తు సుకేతుర్నామ నామత: 5
సుకేతోరపి ధర్మాత్మా దేవరాతో మహాబల:
దేవరాతస్య రాజర్షేర్బృహద్రథ ఇతి స్మృత: 6
బృహద్రథస్య శూరోభూన్మహావీర: ప్రతాపవాన్
మహావీరస్య ధృతిమాన్ సుధృతిస్సత్యవిక్రమ: 7
సుధృతేరపి ధర్మాత్మా దృష్టకేతుస్సుధార్మిక:
దృష్టకేతోస్తు రాజర్షేర్హర్యశ్వ ఇతి విశ్రుత: 8
హర్యశ్వస్య మరు: పుత్రో మరో: పుత్ర: ప్రతిన్ధక:
ప్రతింధకస్య ధర్మాత్మా రాజా కీర్తిరథస్సుత: 9
పుత్ర: కీర్తిరథస్యాపి దేవమీఢ ఇతి స్మృత:
దేవమీఢస్య విబుధో విబుధస్య మహీధ్రక: 10
మహీధ్రకసుతో రాజా కీర్తిరాతో మహాబల:
కీర్తిరాతస్య రాజర్షేర్మహారోమా వ్యజాయత 11
మహారోమ్ణస్తు ధర్మాత్మా స్వర్ణరోమా వ్యజాయత
స్వర్ణరోమ్ణస్తు రాజర్షేర్హ్రస్వరోమా వ్యజాయత 12
తస్య పుత్రద్వయం జజ్ఞే ధర్మజ్ఞస్య మహాత్మన:
జ్యేష్ఠోహమనుజో భ్రాతా మమ వీర: కుశధ్వజ: 13
మాం తు జ్యేష్ఠం పితా రాజ్యే సోభిషిచ్య నరాధిప:
కుశధ్వజం సమావేశ్య భారం మయి వనం గత: 14
వృద్ధే పితరి స్వర్యాతే ధర్మేణ ధురమావహమ్
భ్రాతరం దేవసఙ్కాశం స్నేహాత్పశ్యన్ కుశధ్వజమ్ 15
కస్య చిత్త్వథకాలస్య సాఙ్కాశ్యాదగమత్పురాత్
సుధన్వా వీర్యవాన్రాజా మిథిలామవరోధక: 16
స చ మే ప్రేషయామాస శైవం ధనురనుత్తమమ్
సీతా కన్యా చ పద్మాక్షీ మహ్యం వై దీయతామితి 17
తస్యాప్రదానాద్బ్రహ్మర్షే! యుద్ధమాసీన్మయా సహ
స హతోభిముఖో రాజా సుధన్వా తు మయా రణే 18
నిహత్య తం మునిశ్రేష్ఠ సుధన్వానం నరాధిపమ్
సాఙ్కాశ్యే భ్రాతరం వీరమభ్యషిఞ్చం కుశధ్వజమ్ 19
కనీయానేష మే భ్రాతా అహం జ్యేష్ఠో మహామునే!
దదామి పరమప్రీతో వధ్వౌ తే మునిపుఙ్గవ 20
సీతాం రామాయ భద్రం తే ఊర్మిలా లక్ష్మణాయ చ
వీర్యశుల్కాం మమ సుతాం సీతాం సురసుతోపమామ్ 21
ద్వితీయామూర్మిలాం చైవ త్రిర్దదామి న సంశయ:
దదామి పరమప్రీతో వధ్వౌ తే రఘునన్దన 22
రామలక్ష్మణయో రాజన్! గోదానం కారయస్వ హ
పితృకార్యం చ భద్రం తే తతో వైవాహికం కురు 23
మఖా హ్యద్య మహాబాహో తృతీయే దివసే ప్రభో
ఫల్గున్యాముత్తరే రాజంస్తస్మిన్వైవాహికం కురు 24
రామలక్ష్మణయో రాజన్! దానం కార్యం సుఖోదయమ్ 25
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే ఏకసప్తతితమస్సర్గ:
Bālakāṇḍam - Ēkasaptatitama Sargaḥ
ēvaṃ bruvāṇaṃ janakaḥ pratyuvāca kṛtāñjaliḥ
śrōtumarhasi bhadraṃ tē kulaṃ naḥ parikīrtitam 1
pradānē hi muniśrēṣṭha kulaṃ niravaśēṣataḥ
vaktavyaṃ kulajātēna tannibōdha mahāmunē! 2
rājābhūt triṣu lōkēṣu viśruta s-svēna karmaṇā
nimiḥ paramadharmātmā sarvasattvavatāṃ varaḥ 3
tasya putrō'mithir-nāma mithilā yēna nirmitā
prathamō janakō nāma janakād-apyudāvasuḥ 4
udāvasōstu dharmātmā jātō vāi nandivardhanaḥ
nandivardhanaputrastu sukētur-nāma nāmataḥ 5
sukētōrapi dharmātmā dēvarātō mahābalaḥ
dēvarātasya rājarṣēr-br̥had-ratha iti smṛtaḥ 6
br̥had-rathasya śūrō'bhūn-mahāvīraḥ pratāpavān
mahāvīrasya dhṛtimān sudhṛti-ssatyavikramaḥ 7
sudhr̥tērapi dharmātmā dṛṣṭakētu-ssudhārmikaḥ
dṛṣṭakētōstu rājarṣēr-haryaśva iti viśrutaḥ 8
haryaśvasya maruḥ putrō marōḥ putraḥ pratindhakaḥ
pratindhakasya dharmātmā rājā kīrtiratha-ssutaḥ 9
putraḥ kīrtirathasyāpi dēvamīḍha iti smṛtaḥ
dēvamīḍhasya vibudhō vibudhasya mahīdharakaḥ 10
mahīdharakasutō rājā kīrtirātō mahābalaḥ
kīrtirātasya rājarṣēr-mahārōmā vyajāyata 11
mahārōmṇastu dharmātmā svarṇarōmā vyajāyata
svarṇarōmṇastu rājarṣēr-hrasvarōmā vyajāyata 12
tasya putradvayaṃ jajñē dharmajñasya mahātmanaḥ
jyēṣṭhō'ham-anujō bhrātā mama vīraḥ kuśadhvajaḥ 13
māṃ tu jyēṣṭhaṃ pitā rājyē sō'bhiṣicya narādhipaḥ
kuśadhvajaṃ samāvēśya bhāraṃ mayi vanaṃ gataḥ 14
vṛddhē pitari svaryātē dharmēṇa dhuram-āvaham
bhrātaraṃ dēvasaṅkāśaṃ snēhā-tpaśyan kuśadhvajam 15
kasyachit-tvatha-kālasya sāṅkāśyād-agamat-purāt
sudhanvā vīryavānrājā mithilām-avarōdhakaḥ 16
sa cha mē prēṣayāmāsa śāivaṃ dhanur-anuttamam
sītā kanyā ca padmākṣī mahyaṃ vāi dīyatām-iti 17
tasyāpradānād-brahmarṣē! yuddham-āsīn-mayā saha
sa hatō'bhimukhō rājā sudhanvā tu mayā raṇē 18
nihatya taṃ muniśrēṣṭha sudhanvānaṃ narādhipam
sāṅkāśyē bhrātaraṃ vīram-abhyaṣiñchaṃ kuśadhvajam 19
kanīyān-ēṣa mē bhrātā ahaṃ jyēṣṭhō mahāmunē!
dadāmi paramaprītō vadhvāu tē munipuṅgava 20
sītāṃ rāmāya bhadraṃ tē ūrmilā lakṣmaṇāya cha
vīryaśulkāṃ mama sutāṃ sītāṃ surasutōpamām 21
dvitīyām-ūrmilāṃ caiva trirdadāmi na saṃśayaḥ
dadāmi paramaprītō vadhvāu tē raghuna-ndana 22
rāmalakṣmaṇayō rājan! gōdānaṃ kārayasva ha
pitr̥̄kāryaṃ ca bhadraṃ tē tatō vāivāhikaṃ kuru 23
makhā hyadya mahābāhō tr̥tīyē divasē prabhō
phalgunyām-uttarē rājaṃ-stasm i n-vāivāhikaṃ kuru 24
rāmalak-ṣ-maṇa-yō rājan! dānaṃ kāṛ-yaṃ s uk-hōda-yam 25
iti śrīmadrāmāyaṇē vālmīkīyē ādikāvyē bālakāṇḍē ēkasaptatitamasargaḥ