శ్రీమద్రామాయణము - బాలకాండ
పఞ్చషష్టితమ సర్గము
అథ హైమవతీం రామ దిశం త్యక్త్వా మహాముని:
పూర్వాం దిశమనుప్రాప్య తపస్తేపే సుదారుణమ్ 1
మౌనం వర్షసహస్రస్య కృత్వా వ్రతమనుత్తమమ్
చకారాప్రతిమం రామ తప: పరమదుష్కరమ్ 2
పూర్ణే వర్షసహస్రే తు కాష్ఠభూతం మహామునిమ్
విఘ్నైర్బహుభిరాధూతం క్రోధో నాన్తర ఆవిశత్ 3
స కృత్వా నిశ్చయం రామ తప ఆతిష్టదవ్యయమ్
తస్య వర్షసహస్రస్య వ్రతే పూర్ణే మహావ్రత: 4
భోక్తుమారబ్ధవానన్నం తస్మిన్ కాలే రఘూత్తమ! ఇన్ద్రో ద్విజాతిర్భూత్వా తం సిద్ధమన్నమయాచత 5
తస్మై దత్వా తదా సిద్ధం సర్వం విప్రాయ నిశ్చిత: నిశ్శేషితేన్నే భగవానభుక్తైవ మహాతపా: 6
న కిఞ్చిదవదద్విప్రం మౌనవ్రతముపస్థిత: అథ వర్షసహస్రం వై నోచ్ఛ్వసన్మునిపుఙ్గవ: 7
తస్యానుచ్ఛ్వసమానస్య మూర్ధ్ని ధూమో వ్యజాయత
త్రైలోక్యం యేన సమ్భ్రాన్తమాదీపితమివాభవత్ 8
తతో దేవాస్సగన్ధర్వా: పన్నగోరగరాక్షసా: మోహితాస్తేజసా తస్య తపసా మన్దరశ్మయ: 9
కశ్మలోపహతా స్సర్వే పితామహమథాబ్రువన్
బహుభి: కారణైర్దేవ విశ్వామిత్రో మహాముని: 10
లోభిత: క్రోధితశ్చైవ తపసా చాభివర్ధతే
న హ్యస్య వృజినం కిఞ్చిద్దృశ్యతే సూక్ష్మమప్యథ 11
న దీయతే యది త్వస్య మనసా యదభీప్సితమ్
వినాశయతి త్రైలోక్యం తపసా సచరాచరమ్ 12
వ్యాకులాశ్చ దిశస్సర్వా న చ కిఞ్చిత్ప్రకాశతే
సాగరా: క్షుభితాస్సర్వే విశీర్యన్తే చ పర్వతా: 13
ప్రకమ్పతే చ పృథివీ వాయుర్వాతి భృశాకుల:
బృహ్మన్న ప్రతిజానీమోనాస్తికో జాయతే జన: 14
సమ్మూఢమివ త్రైలోక్యం సమ్ప్రక్షుభితమానసమ్
భాస్కరో నిష్ప్రభశ్చైవ మహర్షేస్తస్య తేజసా 15
బుద్ధిం న కురుతే యావన్నాశే దేవ! మహాముని:
తావత్ప్రసాద్యో భగవా నగ్నిరూపోమహాద్యుతి: 16
కాలాగ్నినా యథాపూర్వం త్రైలోక్యం దహ్యతేఖిలమ్
దేవరాజ్యం చికీర్షేత దీయతామస్య యన్మతమ్ 17
తతస్సురగణైస్సర్వే పితామహపురోగమా:
విశ్వామిత్రం మహాత్మానం మధురం వాక్యమబ్రువన్ 18
బ్రహ్మర్షే స్వాగతం తేస్తు తపసా స్మ సుతోషితా:
బ్రాహ్మణ్యం తపసోగ్రేణ ప్రాప్తవానసి కౌశిక ! 19
దీర్ఘమాయుశ్చ తే బ్రహ్మన్ దదామి సమరుద్గణ:
స్వస్తి ప్రాప్నుహి భద్రం తే గచ్ఛ సౌమ్య యథాసుఖమ్ 20
పితామహవచశ్శృత్వా సర్వేషాం చ దివౌకసామ్
కృత్వా ప్రణామం ముదితో వ్యాజహార మహాముని: 21
బ్రాహ్మణ్యం యది మే ప్రాప్తం దీర్ఘమాయుస్తథైవ చ
ఓఙ్కారశ్చ వషట్కారో వేదాశ్చ వరయన్తు మామ్ 22
క్షత్రవేదవిదాం శ్రేష్ఠో బ్రహ్మవేదవిదామపి
బ్రహ్మపుత్రో వసిష్ఠో మామేవం వదతు దేవతా:! 23
యద్యయం పరమ: కామ: కృతో యాన్తు సురర్షభా:
తత: ప్రసాదితో దేవైర్వసిష్ఠో జపతాం వర: 24
సఖ్యం చకార బ్రహ్మర్షిరేవమస్త్వితి చాబ్రవీత్
బ్రహ్మర్షిస్త్వం న సన్దేహస్సర్వం సమ్పత్స్యతే తవ 25
ఇత్యుక్త్వా దేవతాశ్చాపి సర్వా జగ్ముర్యథాగతమ్
విశ్వామిత్రోపి ధర్మాత్మా లబ్ధ్వా బ్రాహ్మణ్యముత్తమమ్ 26
పూజయామాస బ్రహ్మర్షిం వసిష్ఠం జపతాం వరమ్
కృతకామో మహీం సర్వాం చచార తపసి స్థిత: 27
ఏవం త్వనేన బ్రాహ్మణ్యం ప్రాప్తం రామ మహాత్మనా
ఏష రామ మునిశ్రేష్ఠ ఏష విగ్రహవాంస్తప: 28
ఏష ధర్మపరో నిత్యం వీర్యస్యైష పరాయణమ్
ఏవముక్త్వా మహాతేజా విరరామ ద్విజోత్తమ: 29
శతానన్దవచ: శ్రుత్వా రామలక్ష్మణసన్నిధౌ
జనక: ప్రాఞ్జలిర్వాక్యమువాచ కుశికాత్మజమ్ 30
ధన్యోస్మ్యనుగృహీతోస్మి యస్య మే మునిపుఙ్గవ!
యజ్ఞం కాకుత్స్థసహిత: ప్రాప్తవానసి ధార్మిక 31
పావితోహం త్వయా బ్రహ్మన్ దర్శనేన మహామునే! గుణా బహువిధా: ప్రాప్తాస్తవ సన్దర్శనాన్మయా 32
విస్తరేణ చ తే బ్రహ్మన్ కీర్త్యమానం మహత్తప:
శ్రుతం మయా మహాతేజో రామేణ చ మహాత్మనా 33
సదస్యై: ప్రాప్య చ సద: శ్రుతాస్తే బహవో గుణా:
అప్రమేయం తపస్తుభ్యమప్రమేయం చ తే బలమ్ 34
అప్రమేయా గుణాశ్చైవ నిత్యం తే కుశికాత్మజ !
తృప్తిరాశ్చర్యభూతానాం కథానాం నాస్తి మే విభో 35
కర్మకాలో మునిశ్రేష్ఠ లమ్బతే రవిమణ్డలమ్
శ్వ: ప్రభాతే మహాతేజో ద్రష్టుమర్హసి మాం పున: 36
స్వాగతం తపతాం శ్రేష్ఠ! మామనుజ్ఞాతుమర్హసి
ఏవముక్తో మునివర: ప్రశస్య పురుషర్షభమ్ 37
విససర్జాశు జనకం ప్రీతం ప్రీతమనాస్తదా
ఏవముక్త్వా మునిశ్రేష్ఠం వైదేహో మిథిలాధిప: 38
ప్రదక్షిణం చకారాశు సోపాధ్యాయస్సబాన్ధవ:
విశ్వామిత్రోపి ధర్మాత్మా సహరామస్సలక్ష్మణ: 39
స్వవాటమభిచక్రామ పూజ్యమానో మహర్షిభి: 40
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే పఞ్చషష్టితమస్సర్గ: