శ్రీమద్రామాయణము - బాలకాండ
ఏకషష్టితమ సర్గము
విశ్వామిత్రో మహాత్మాథ ప్రస్థితాన్ ప్రేక్ష్య తానృషీన్
అబ్రవీన్నరశార్దూలస్సర్వాంస్తాన్వనవాసిన: 1
మహాన్విఘ్న: ప్రవృత్తోయం దక్షిణామాస్థితో దిశమ్
దిశమన్యాం ప్రపత్స్యామస్తత్ర తప్స్యామహే తప: 2
పశ్చిమాయాం విశాలాయాం పుష్కరేషు మహాత్మన:
సుఖం తపశ్చరిష్యామ: పరం తద్ధి తపోవనమ్ 3
ఏవముక్త్వా మహాతేజా: పుష్కరేషు మహాముని:
తప ఉగ్రం దురాధర్షం తేపే మూలఫలాశన: 4
ఏతస్మిన్నేవ కాలే తు అయోధ్యాధిపతిర్నృప:
అమ్బరీష ఇతి ఖ్యాతో యష్టుం సముపచక్రమే 5
తస్య వై యజమానస్య పశుమిన్ద్రో జహార హ
ప్రణష్టే తు పశౌ విప్రో రాజానమిదమబ్రవీత్ 6
పశురద్య హృతో రాజన్! ప్రణష్టస్తవ దుర్నయాత్
అరక్షితారం రాజానం ఘ్నన్తి దోషా నరేశ్వర 7
ప్రాయశ్చిత్తం మహద్ధ్యేతన్నరం వా పురుషర్షభ !
ఆనయస్వ పశుం శీఘ్రం యావత్కర్మ ప్రవర్తతే 8
ఉపాధ్యాయవచశ్శ్రుత్వా స రాజా పురుషర్షభ!
అన్వియేష మహాబుద్ధి: పశుం గోభిస్సహస్రశ: 9
దేశాన్ జనపదాంస్తాం స్తాన్నగరాణి వనాని చ
ఆశ్రమాణి చ పుణ్యాని మార్గమాణో మహీపతి: 10
స పుత్రసహితం తాత సభార్యం రఘునన్దన
భృగుతుందే సమాసీనమృచీకం సన్దర్శ హ 11
తమువాచ మహాతేజా: ప్రణమ్యాభిప్రసాద్య చ
బ్రహ్మర్షిం తపసా దీప్తం రాజర్షిరమితప్రభ: 12
పృష్ట్వా సర్వత్ర కుశలమృచీకం తమిదం వచ:
గవాం శతసహస్రేణ విక్రీణీషే సుతం యది 13
పశోరర్థే మహాభాగ! కృతకృత్యోస్మి భార్గవ!
సర్వే పరిసృతా దేశా యాజ్ఞీయం న లభే పశుమ్ 14
దాతుమర్హసి మూల్యేన సుతమేకమితో మమ
ఏవముక్తో మహాతేజా ఋచీకస్త్వబ్రవీద్వచ: 15
నాహం జ్యేష్ఠం నరశ్రేష్ఠ విక్రీణీయాం కథఞ్చన
ఋచీకస్య వచశ్శ్రుత్వా తేషాం మాతా మహాత్మనామ్ 16
ఉవాచ నరశార్దూలమమ్బరీషం తపస్వినీ
అవిక్రేయం సుతం జ్యేష్ఠం భగవానాహ భార్గవ: 17
మమాపి దయితం విద్ధి కనిష్ఠం శునకం నృప!
తస్మాత్కనీయసం పుత్రం న దాస్యే తవ పార్థివ! 18
ప్రాయేణ హి నరశ్రేష్ఠ జ్యేష్ఠా: పితృషు వల్లభా:
మాతృాం తు కనీయాంసస్తస్మాద్రక్షే కనీయసమ్ 19
ఉక్తవాక్యం మునౌ తస్మిన్ మునిపత్న్యాం తథైవ చ
శునశ్శేఫస్స్వయం రామ! మధ్యమో వాక్యమబ్రవీత్ 20
పితా జ్యేష్ఠమవిక్రేయం మాతా చాహ కనీయసమ్
విక్రీతం మధ్యమం మన్యే రాజన్ పుత్రం నయస్వ మామ్ 21
గవాం శతసహస్రేణ శునశ్శేఫం నరేశ్వర:
గృహీత్వా పరమప్రీతో జగామ రఘునన్దన 22
అమ్బరీషస్తు రాజర్షీ రథమారోప్య సత్వర:
శునశ్శేఫం మహాతేజా జగామాశు మహాయశా: 23
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే ఏకషష్టితమస్సర్గ: