శ్రీమద్రామాయణము - బాలకాండ
షష్టితమ సర్గము
తపోబలహతాన్ కృత్వా వాసిష్ఠాన్ సమహోదయాన్
ఋషిమధ్యే మహాతేజా విశ్వామిత్రోభ్యభాషత 1
అయమిక్ష్వాకుదాయాదస్త్రిశంకురితి విశ్రుత:
ధర్మిష్ఠశ్చ వదాన్యశ్చ మాం చైవ శరణం గత: 2
తేనానేన శరీరేణ దేవలోకజిగీషయా
యథాయం స్వశరీరేణ స్వర్గలోకం గమిష్యతి 3
తథా ప్రవర్త్యతాం యజ్ఞే భవద్భిశ్చ మయా సహ
విశ్వామిత్రవచ శ్శ్రుత్వా సర్వ ఏవ మహర్షయ: 4
ఊచుస్సమేత్య సహితా ధర్మజ్ఞా ధర్మసంహితమ్
అయం కుశికదాయాదో ముని: పరమకోపన: 5
యదాహ వచనం సమ్యగేతత్కార్యం న సంశయ:
అగ్నికల్పో హి భగవాన్ శాపం దాస్యతి రోషిత: 6
తస్మాత్ప్రవర్త్యతాం యజ్ఞ స్సశరీరో యథా దివమ్
గచ్ఛేదిక్ష్వాకుదాయాదో విశ్వామిత్రస్య తేజసా 7
తథా ప్రవర్త్యతాం యజ్ఞ స్సర్వే సమధితిష్ఠత
ఏవముక్త్వా మహర్షయః చక్రుస్తాస్తా:క్రియాస్తదా 8
యాజకశ్చ మహాతేజా విశ్వామిత్రోభవత్క్రతౌ
ఋత్విజశ్చానుపూర్వ్యేణ మన్త్రవన్మన్త్రకోవిదా: 9
చక్రు: కర్మాణి సర్వాణి యథాకల్పం యథావిధి
తతో కాలేన మహతా విశ్వామిత్రో మహాతపా: 10
చకారావాహనం తత్ర భాగార్థం సర్వదేవతా:
నాభ్యాగమంస్తదాహూతా భాగార్థం సర్వదేవతా: 11
తతో క్రోధసమావిష్టో విశ్వామిత్రో మహాముని:
స్రువముద్యమ్య సక్రోధస్త్రిశఙ్కుమిదమబ్రవీత్ 12
పశ్య మే తపసో వీర్యం స్వార్జితస్య నరేశ్వర! ఏష త్వాం సశరీరేణ నయామి స్వర్గమోజసా 13
దుష్ప్రాపం సశరీరేణ దివం గచ్ఛ నరాధిప
స్వార్జితం కిఞ్చిదప్యస్తి మయా హి తపస:ఫలమ్ 14
రాజన్ స్వతేజసా తస్య సశరీరో దివం వ్రజ
ఉక్తవాక్యే మునౌ తస్మిన్ సశరీరో నరేశ్వర: 15
దివం జగామ కాకుత్స్థ మునీనాం పశ్యతాం తదా
దేవలోకగతం దృష్ట్వా త్రిశఙ్కుం పాకశాసన: 16
సహ సర్వైస్సురగణైరిదం వచనమబ్రవీత్
త్రిశఙ్కో గచ్ఛ భూయస్త్వం నాసి స్వర్గకృతాలయ: 17
గురుశాపహతో మూఢ! పత భూమిమవాక్ఛిరా:
ఏవముక్తో మహేన్ద్రేణ త్రిశఙ్కురపతత్పున: 18
విక్రోశమానస్త్రాహీతి విశ్వామిత్రం తపోధనమ్
తచ్ఛ్రుత్వా వచనం తస్య క్రోశమానస్య కౌశిక: 19
రోషమాహారయత్తీవ్రం తిష్ఠ తిష్ఠేతి చాబ్రవీత్
ఋషిమధ్యే స తేజస్స్వీ ప్రజాపతిరివాపర: 20
సృజన్ దక్షిణమార్గస్థాన్ సప్తర్షీనపరాన్ పున:
నక్షత్రమాలామపరామసృజత్క్రోధమూర్చ్ఛిత: 21
దక్షిణాం దిశమాస్థాయ మునిమధ్యే మహాయశా:
సృష్ట్వా నక్షత్రవంశం చ క్రోధేన కలుషీకృత: 22
అన్యమిన్ద్రం కరిష్యామి లోకో వా స్యాదనిన్ద్రక:
దైవతాన్యపి స క్రోధా త్స్రష్టుం సముపచక్రమే 23
తత: పరమసమ్భ్రాన్తాస్సర్షిసఙ్ఘాస్సురాసురా:
విశ్వామిత్రం మహాత్మానమూచు: సానునయం వచ: 24
అయం రాజా మహాభాగ గురుశాపపరిక్షత:
సశరీరో దివం యాతుం నార్హత్యేవ తపోధన! 25
తేషాం తద్వచనం శ్రుత్వా దేవానాం మునిపుఙ్గవ: అబ్రవీత్సుమహద్వాక్యం కౌశిక: సర్వదేవతా: 26
సశరీరస్య భద్రం వస్త్రిశఙ్కోరస్య భూపతే:
ఆరోహణం ప్రతిజ్ఞాయ నానృతం కర్తుముత్సహే 27
స్వర్గోస్తు సశరీరస్య త్రిశఙ్కోరస్య శాశ్వత:
నక్షత్రాణి చ సర్వాణి మామకాని ధ్రువాణ్యథ 28
యావల్లోకా ధరిష్యన్తి తిష్ఠన్త్వేతాని సర్వశ:
మత్కృతాని సురా స్సర్వే తదనుజ్ఞాతుమర్హథ 29
ఏవముక్తా: సురాస్సర్వే ప్రత్యూచుర్మునిపుఙ్గవమ్
ఏవం భవతు భద్రం తే తిష్ఠన్త్వేతాని సర్వశ: 30
గగనే తాన్యనేకాని వైశ్వానరపథాద్బహి:
నక్షత్రాణి మునిశ్రేష్ఠ తేషు జ్యోతిష్షు జాజ్వలన్ 31
అవాక్ఛిరాస్త్రిశఙ్కుశ్చ తిష్ఠత్వమరసన్నిభ:
అనుయాస్యన్తి చైతాని జ్యోతీంషి నృపసత్తమమ్ 32
కృతార్థం కీర్తిమన్తం చ స్వర్గలోకగతం యథా
విశ్వామిత్రస్తు ధర్మాత్మా సర్వదేవైరభిష్టుత: 33
ఋషిభిశ్చ మహాతేజా బాఢమిత్యాహ దేవతా:
తతో దేవా మహాత్మానో మునయశ్చ తపోధనా:
జగ్ముర్యథాగతం సర్వే యజ్ఞస్యాన్తే నరోత్తమ! 34
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే షష్టితమస్సర్గ: