శ్రీమద్రామాయణము - బాలకాండ
చతుష్పఞ్చాశ సర్గము
కామధేనుం వసిష్ఠోపి యదా న త్యజ్యతే ముని: తదాస్య శబలాం రామ విశ్వామిత్రోన్వకర్షత 1
నీయమానా తు శబలా రామ రాజ్ఞా మహాత్మనా
దు:ఖితా చిన్తయామాస రుదన్తీ శోకకర్శితా 2
పరిత్యక్తా వసిష్ఠేన కిమహం సుమహాత్మనా
యాహం రాజభటైర్దీనా హ్రియేయ భృశదు:ఖితా 3
కిం మయాపకృతం తస్య మహర్షేర్భావితాత్మన: యన్మామనాగసం భక్తామిష్టాం త్యజతి ధార్మిక: 4
ఇతి సా చిన్తయిత్వా తు వినిశ్శ్వస్య పున:పున: నిర్ధూయ తాంస్తదా భృత్యాన్ శతశశ్శత్రుసూదన
జగామానిలవేగేన పాదమూలం మహాత్మన: 5
శబలా సా రుదన్తీ చ క్రోశన్తీ చేదమబ్రవీత్
వసిష్ఠస్యాగ్రతస్స్థిత్వా మేఘదున్దుభిరావిణీ 6
భగవన్ కిం పరిత్యక్తా త్వయాహం బ్రహ్మణస్సుత!
యస్మాద్రాజభృతా మాం హి నయన్తే త్వత్సకాశత: 7
ఏవముక్తస్తు బ్రహ్మర్షిరిదం వచనమబ్రవీత్
శోకసన్తప్తహృదయాం స్వసారమివ దు:ఖితామ్ 8
న త్వాం త్యజామి శబలే! నాపి మేపకృతం త్వయా
ఏష త్వాం నయతే రాజా బలోన్మత్తో మహాబల: 9
న హి తుల్యం బలం మహ్యం రాజా త్వద్య విశేషత:
బలీ రాజా క్షత్రియశ్చ పృథివ్యా: పతిరేవ చ 10
ఇయమక్షౌహిణీ పూర్ణా సవాజిరథసఙ్కులా
హస్తిధ్వజసమాకీర్ణా తేనాసౌ బలవత్తర: 11
ఏవముక్తా వసిష్ఠేన ప్రత్యువాచ వినీతవత్
వచనం వచనజ్ఞా సా బ్రహ్మర్షిమమితప్రభమ్ 12
న బలం క్షత్రియస్యాహుర్బ్రాహ్మణో బలవత్తర:
బ్రహ్మన్ బ్రహ్మబలం దివ్యం క్షత్రాత్తు బలవత్తరమ్ 13
అప్రమేయబలం తుభ్యం న త్వయా బలవత్తర:
విశ్వామిత్రో మహావీర్యస్తేజ స్తవ దురాసదమ్ 14
నియుఙ్క్ష్వ మాం మహాభాగ త్వద్బ్రహ్మబలసమ్భృతామ్
తస్య దర్పబలం యత్తన్నాశయామి దురాత్మన: 15
ఇత్యుక్తస్తు తయా రామ వసిష్ఠ స్సుమహాయశా:
సృజస్వేతి తదోవాచ బలం పరబలార్దన: 16
తస్య తద్వచనం శ్రుత్వా సురభిస్సాసృజత్తదా 17
తస్యా హుమ్భారవోత్సృష్టా: పప్లవాశ్శతశో నృప
నాశయన్తి బలం సర్వం విశ్వామిత్రస్య పశ్యత: 18
బలం భగ్నం తతో దృష్ట్వా రథేనాక్రమ్య కౌశిక: స రాజా పరమక్రుద్ధో రోషవిస్ఫారితేక్షణ:
పప్లవాన్నాశయామాస శస్త్రైరుచ్చావచైరపి 19
విశ్వామిత్రార్దితాన్ దృష్ట్వా పప్లవాఞ్ఛతశస్తదా
భూయ ఏవాసృజత్కోపాచ్ఛకాన్ యవనమిశ్రితాన్ 20
తైరాసీత్ సంవృతా భూమి శ్శకైర్యవనమిశ్రితై:
ప్రభావద్భిర్మహావీర్యైర్హేమకిఞ్జల్కసన్నిభై: 21
దీర్ఘాసిపట్టిశధరైఃమవర్ణామ్బరావృతై:
నిర్దగ్ధం తద్బలం సర్వం ప్రదీప్తైరివ పావకై: 22
తతోస్త్రాణి మహాతేజా విశ్వామిత్రో ముమోచ హ
తైస్తైర్యవనకామ్భోజా: పప్లవాశ్చాకులీకృతా: 23
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే చతుష్పఞ్చాశస్సర్గ: