ఊరకే వెదకనేల వున్నవి చదవనేల Urake Vedakanela Vunnavi Chadavanela

Author: Annamacharya

ఊరకే వెదకనేల వున్నవి చదవనేల

పల్లవి:
ఊరకే వెదకనేల వున్నవి చదవనేల |
చేరువనె వున్నదిదె చెప్పరాని ఫలము ||

భగవంతుని కోసం ఎక్కడెక్కడో వెతకడం ఎందుకు? గ్రంథాలను వల్లె వేయడం ఎందుకు? వర్ణించనలవి కాని ఆ మోక్ష ఫలం మనకు అతి చేరువలోనే (మనలోనే) ఉంది.

చరణం 1:
కోపము విడిచితేనె పాపము దానే పోవు |
దీపింప సుజ్ఞానముతెరు విదివో |
లోపల మనిలుఁడై లోకముమెచ్చుకొరకు |
పైపైఁగడిగితేను పావనుఁడౌనా //ఊరకే//

భావం: మనిషి కోపాన్ని వదిలిపెడితే పాపాలు అవే తొలగిపోతాయి. ఇదే నిజమైన జ్ఞాన మార్గం. మనసు లోపల కలుషితంగా ఉంచుకొని, లోకం మెచ్చడం కోసం పైన స్నానాలు చేసినంత మాత్రాన మనిషి పవిత్రుడు అవుతాడా? (అవ్వడు అని భావం).

చరణం 2:
ముందరికోరిక వోతే ముంచిన బంధాలు వీడు |
కందువ నాస మానితే కైవల్యము |
బొందిలోన నొకటియు భూమిలోన నొకటియు |
చిందు వందు చిత్తమైతే చేరునా వైకుంఠము //ఊరకే//

భావం: కోరికలు నశిస్తే సంసార బంధాలు వాటంతట అవే వీడిపోతాయి. ఆశను వదిలితేనే కైవల్యం (మోక్షం) లభిస్తుంది. మనసులో ఒకటి, బయట మరొకటి ఉంటూ.. చంచలమైన చిత్తంతో ఉంటే వైకుంఠాన్ని చేరుకోగలమా?

చరణం 3:
కాంతలపొం దొల్లకుంటే ఘనదుఃఖమే లేదు |
అంతరాత్మ శ్రీవేంకటాద్రీశుఁడు |
అంతట మాటలె యాడి హరి శరణనకుంటే |
దొంతినున్నభవములు తొలఁగునా వివేకికి //ఊరకే//

భావం: అతివ్యామోహాలను వదిలితే దుఃఖమే ఉండదు. మన అంతరాత్మలో కొలువై ఉన్నది ఆ శ్రీవేంకటేశ్వరుడే. కేవలం మాటలు చెబుతూ, ఆ హరిని శరణు వేడకపోతే.. కుప్పలు తెప్పలుగా ఉన్న ఈ జన్మల కష్టాలు వివేకికి ఎలా తొలగుతాయి?