ఊరకే నీశరణని వుండుటే నాపనిగాక Oorakae Neesaranani

Author: Annamacharya

ఊరకే నీశరణని వుండుటే నాపనిగాక

పల్లవి:
ఊరకే నీశరణని వుండుటే నాపనిగాక |
యీరీతి నావుపాయము లేడ కెక్కీనయ్యా ||

స్వామీ! నిన్ను శరణు వేడి నిశ్చింతగా ఉండటమే నా పని. అంతకు మించి నేను చేసే ఇతర ప్రయత్నాలు లేదా ఉపాయాలు ఫలిస్తాయని నేను అనుకోను.

చరణం 1:
ముందే అంతర్యామివై మొగి నాలో నుండగాను |
చెంది నిన్ను లేనివానిజేసుక నామనసులో |
గొంది నీయాకారముగా కొంత నే భావించుకొంటా |
ఇందు గల్పిత ధ్యానము లెట్టు చేసేనయ్యా //ఊరకే//

భావం: నీవు ఇప్పటికే నాలో అంతర్యామిగా ఉన్నావు. అలాంటప్పుడు నిన్ను నాలో లేనివానిగా భావించి, మనసులోని ఒక మూల నీదొక రూపాన్ని ఊహించుకొని, కల్పిత ధ్యానాలు చేయడం నా వల్ల ఎలా అవుతుంది? (నీవు సర్వవ్యాపివి కదా అని భావం).

చరణం 2:
కన్నులు జూచినందెల్ల కమ్మి నీవై యుందగాను |
అన్నిటా బ్రత్యక్షమందు అభావన చేసుకొని |
విన్ననై తెలియలేక వేరే యెందొ వెదకుచు |
పన్నినప్రయాసాల బడనేటికయ్యా //ఊరకే//

భావం: నా కళ్ళకు కనిపించే ప్రతిదానిలోనూ నీవే ఉన్నావు. ప్రతి వస్తువులోనూ నీవు ప్రత్యక్షంగా కనిపిస్తుంటే, అది తెలియక నిన్ను ఎక్కడో వెతకడం ఎందుకు? ఆ వృథా ప్రయాసలు నాకెందుకు స్వామీ?

చరణం 3:
శ్రీ వేంకటాద్రిమీద శ్రీపతివై కొలువుండి |
ఆవటించి తలపులో నచ్చొత్తి నట్టుండగాను |
దేవు డెట్టివాడంటా తెగనిచదువులందు |
సోవలుగా నింకనేమి సోదించేనయ్యా //ఊరకే//

భావం: శ్రీవేంకటాద్రి మీద శ్రీపతివై కొలువై ఉన్నావు, నా తలపులలో అచ్చువేసినట్లుగా నిలిచి ఉన్నావు. అలాంటప్పుడు దేవుడు ఎలా ఉంటాడని అంతులేని చదువులు చదువుతూ, నిన్ను ఇంకా శోధించడం ఎందుకు? నీవు నాకు అనుభవంలోనే ఉన్నావు.